«استانا» كونتسەرت زالىندا ەلوردانىڭ 20 جىلدىق مەرەيتويىنا وراي قالالىق پەداگوگيكالىق ۇجىمداردىڭ كوركەمونەرپازدار بايقاۋىنىڭ گالا-كونتسەرتى ءوتتى.
بۇل شارا «رۋحاني جاڭعىرۋ» باعدارلاماسى اياسىندا ۇيىمداستىرىلدى. بايقاۋدىڭ ماقساتى – ۇستازداردىڭ شىعارماشىلىق ونەرىن دامىتۋدى كوزدەگەن. نەگىزى, كونكۋرس جىل باسىندا باستالعان. دالىرەك ايتقاندا, اقپان ايىنداعى كوللەدجدەر اراسىنداعى سايىستا كاسىبي-تەحنيكالىق, قۇرىلىس, قوعامدىق تاماقتانۋ جانە سەرۆيس كوللەدجدەرى ۇزدىكتەر قاتارىنان كورىنگەن بولاتىن. ال ناۋرىز ايىندا بايقاۋ باس شاھارداعى جالپى ورتا ءبىلىم بەرەتىن مەكتەپتەر اراسىندا ءوتتى. وندا ەلۋدەن استام ۇجىم باق سىنادى. سولاردىڭ اراسىنان قازىلار القاسى № 48 مەكتەپ-ليتسەيى مەن № 4, 10, 31, 59, 38, 56, 69, 72, 83 ورتا مەكتەپتەرى جانە №1, 2,3 مۋزىكالىق مەكتەپتەردىڭ ونەرپاز ۇجىمدارىنىڭ شىعارماشىلىعىن جوعارى باعالاعان. كونكۋرسقا باس-اياعى 6000 مۇعالىم قاتىسقان.
ال كەشەگى وتكەن گالا-كونتسەرتتە بارلىق ءبىلىم بەرۋ ۇيىمدارى ونەر كورسەتتى. شارانىڭ اشىلۋىندا ءبىلىم باسقارماسىنىڭ باستىعى ءانۋار جانعوزين ءسوز الىپ, ۇستازدار قاۋىمىن ايتۋلى كۇنمەن قۇتتىقتاپ, ولارعا ساتتىلىك تىلەدى. كونتسەرت بارىسىندا مۇعالىمدەر اۋەلەتىپ ءان سالىپ, كۇمبىرلەتىپ كۇي توكتى. ءبيدىڭ دە كورىگىن قىزدىردى. ولارعا اتا-انالار مەن وقۋشىلار قاۋىمى ريزاشىلىق ءبىلدىردى.
سونىمەن, بايقاۋدىڭ گران-ءپريىن №48 مەكتەپ-ليتسەيى جەڭىپ الدى. ءبىرىنشى ورىندى № 59, 37 ورتا مەكتەبى مەن كاسىپتىك كوللەدجى يەلەندى. ەكىنشى ورىن № 56, 76 جانە 30 مەكتەپكە بۇيىردى. ءۇشىنشى ورىندى № 72, 78 جانە 31 مەكتەپ قاناعات تۇتتى. بارلىق ونەرپاز ۇجىمدار باعالى سىيلىقتارمەن ماراپاتتالدى.
ازامات ەسەنجول
