جۋىردا ەلورداداعى ج.دوسمۇحامەدۇلى كوشەسىندەگى جاتاقحانادان ءورت شىقتى. عيماراتتىڭ ەكىنشى قاباتىنداعى اۋماعى 18 شارشى مەترلىك بولمە ورتكە وراندى. ءورت سوندىرۋشىلەر ءتىلسىز جاۋدى دەر كەزىندە اۋىزدىقتادى.
32 ادام قاۋىپسىز جەرگە كوشىرىلدى. زارداپ شەككەن 26 ادام جەدەل اۋرۋحاناعا جەتكىزىلدى. ولاردىڭ ىشىندە 14-ءى بالالار بولدى.
وقيعا ورنىنا دەرەۋ جەتكەن ەلوردا اكىمى باقىت سۇلتانوۆ ورتتەن زارداپ شەككەندەرگە جان-جاقتى كومەك كورسەتۋدى تاپسىردى. جاتاقحانا تۇرعىندارى نىساندى اپاتتىق جاعدايدا بۇزىلاتىن ۇيلەردىڭ قاتارىنا قوسۋدى سۇرادى. قالا باسشىسى بۇل ءوتىنىشتى ارنايى كوميسسياعا جىبەرىپ, عيمارات تەكسەرىلەتىنىن ايتتى. كوپ ۇزاماي ءورتتىڭ شىعۋ سەبەپتەرى انىقتالدى. مامانداردىڭ ايتۋىنشا, الدىن الا بولجام بويىنشا ءورت تۇرمىستىق بۇيىمدار مەن ەلەكتر توگىنىڭ تۇيىقتالۋىنان شىققان. الايدا تولىق قورىتىندى زەرتتەۋدەن كەيىن بەلگىلى بولادى.
ايتپاقشى, قالالىق توتەنشە جاعدايلار دەپارتامەنتىنىڭ وكىلى, قورعانىس پولكوۆنيگى ورال ءابدىراحمانوۆ جاتاقحانانىڭ تاۋەكەلدەر دەڭگەيى جوعارى عيماراتتار تىزىمىنە كىرەتىنىن مالىمدەدى. «وسى وقيعا بويىنشا عيماراتقا جاۋاپتى «نۇرجەڭىس.kz-2008» پاتەر يەلەرى كووپەراتيۆىنىڭ باسشىلىعىنا تەكسەرۋ جۇرگىزىلىپ, زاڭ تالاپتارىن بۇزعانى ءۇشىن 200 مىڭ تەڭگە ايىپپۇل سالىندى» دەدى جاۋاپتى مامان.
