كەلەر جىلدىڭ باسىندا «شاپاعات» كوممۋنالدىق بازارى جەكەنىڭ قولىنا وتەدى. بۇل تۋرالى «Astana» الەۋمەتتىك-كاسىپكەرلىك كورپوراتسياسىنىڭ باسقارما توراعاسى نۇرلان جاقىپ قالالىق اكىمدىكتىڭ ءباسپاسوز ورتالىعىندا وتكەن بريفينگتە مالىمدەدى.
قالانىڭ ازىق-تۇلىك قاۋىپسىزدىگىن قامتاماسىز ەتۋ اياسىنداعى ستراتەگيالىق ماڭىزدىلىعىن ەسكەرە وتىرىپ, «Astana» اكك قۇزىرلى ورگاندارعا بازاردى جەكەشەلەندىرۋدى بولدىرماۋ تۋرالى بىرنەشە رەت حات جولداعان. الايدا ەكونوميكانى جاڭعىرتۋ نەگىزىندە مەملەكەتتىك كوميسسيانىڭ 2018 جىلدىڭ 25 ماۋسىمداعى شەشىمىنە سايكەس, كورپوراتسياعا «شاپاعات» كوممۋنالدىق بازارىن باسەكەلەستىك ورتاعا وتكىزۋ تۋرالى جۇمىستاردى جالعاستىرۋ تاپسىرىلعان ەكەن. بۇل رەتتە «Astana» اكك» اق كورپوراتسياعا تيەسىلى جارعى كاپيتالىنداعى 100 پايىز ۇلەسىن مەملەكەتتىك رەەستردىڭ پورتالىندا تەندەر ارقىلى ساتۋعا شەشىم قابىلداعان. سوعان وراي, اتالمىش بازاردى ساتۋ تۋرالى 11 جانە 27 جەلتوقسان كۇندەرى ەكى رەت تەندەر جاريالانىپ, ەكەۋىندە دە ناتيجە بولماعان.
– 11 جەلتوقسان كۇنى تەندەر العاش رەت جاريالانعاندا وعان ءبىر-اق ۇمىتكەر قاتىستى. الايدا زاڭدىلىق بويىنشا ۇمىتكەرلەردىڭ سانى كەم دەگەندە ەكەۋ بولۋى كەرەك. سول سەبەپتى تەندەر ناتيجەسىز بولدى. ال ەكىنشى رەتىندە ەكى ۇمىتكەر قاتىسقانمەن, ولاردىڭ بىرەۋىنىڭ قۇجاتى تالاپقا ساي بولماي, تەندەر تاعى دا توقتاتىلدى. ەندىگى تەندەر وتكىزۋ شاراسى كەلەر جىلدىڭ قاڭتار ايىنىڭ باسىندا جۇزەگە اسىرىلادى. جالپى, 2017 جىلى بۇل بازاردىڭ كىرىس قارجىسى 80 ميلليون تەڭگەگە جۋىقتادى. بيىلعى كىرىس مولشەرى الداعى كۇندەرى بەلگىلى بولادى. ال بولاشاق بازار قوجايىنى ونداعى قازىرگى جاعدايدى وسى قالىپتان وزگەرتپەۋى ءتيىس. ماسەلەن, الەۋمەتتىك ازىق-تۇلىك باعالارى وسپەيدى. وتاندىق 50 تاۋار ءوندىرۋشىنىڭ ونىمدەرى ساۋدالانادى. ءوز قولدارىمەن جاساعان دۇنيەلەرىن ساتىلىمعا قوياتىن بىرقاتار زەينەتكەرلەرگە ادەتتەگىدەي ءبىرشاما ورىن تەگىن ۇسىنىلادى. ونىڭ ءبارى تەندەر قۇجاتىندا تولىق جازىلعان. ءبىز مۇنى قاتاڭ باقىلاۋدا ۇستايمىز, – دەيدى باسقارما توراعاسى.
استانادا جەمىس-جيدەك, ازىق-تۇلىكتى ءتيىمدى باعامەن وسى شاپاعاتتان الۋعا بولادى.