شاراپاتى مول شارا
ەلوردانىڭ سول جاعالاۋىنداعى «بوتانيكالىق باعىنا» «التىن وردا» بيزنەس-كلۋبىنىڭ ۇيىتقى بولۋىمەن بيىلعى قاڭتار ايىندا اقتوبەدەگى «سامارا – شىمكەنت» جولىندا مەرت بولعان 52 وزبەكستاندىقتىڭ رۋحىنا باعىشتاپ, 52 جەمىس اعاشى وتىرعىزىلدى.
شاراعا قازاقستانداعى وزبەكستان رەسپۋبليكاسىنىڭ ەلشىسى, قالالىق ءماسليحات دەپۋتاتتارى, كاسىپكەرلەر قاتىستى. ولار ەندى كوركەيىپ كەلە جاتقان جاڭا باققا 42 الما مەن 10 شەتەن اعاشىن ەكتى. وزبەكستاننىڭ قازاقستانداعى توتەنشە جانە وكىلەتتى ەلشىسى سايديكرام نيازقودجاەۆ ءوز قولىمەن ءبىر ءتۇپ الما اعاشىن وتىرعىزىپ, سول قايعىلى وقيعانى بولىسكەن قازاقستان حالقىنا العىسىن جەتكىزدى. «سونداي اۋىر جاعدايدا قازاقستان ۇكىمەتى ۇلكەن قولداۋ كورسەتتى. ءتيىستى ورگاندار بارلىق قاجەتتى كومەكتى جاسادى. بۇگىنگى وتىرعىزىلعان اعاشتار – ەكى ەل اراسىنداعى دوستىقتىڭ ۇلگىسى. ءارى بۇل قاسيەتتى ورازا ايىندا جاسالىپ وتىر. ونىڭ ساۋابى مول. وسى ىزگىلىكتى شارا جايىندا قازا بولعان وزبەكستاندىقتاردىڭ وتباسىلارىنا مىندەتتى تۇردە جەتكىزەمىز» دەدى ەلشى مىرزا.
وسىنداي ساۋاپتى ىسكە باس بولىپ جۇرگەن «التىن وردا» بيزنەس-كلۋبىنىڭ توراعاسى مارحابات بالعاباي دەگەن ازامات.
«ءبىز بۇل شارانى ءوز ەركىمىزبەن قولعا الدىق. بيىل – قازاقستانداعى وزبەكستان جىلى. ءبىر جاعىنان, باۋىرلاس حالىقپىز. تاريحىمىز, رۋحاني مۇرامىز ۇقساس. قازىر ءبىزدىڭ كا-
ءسىپكەرلەر كورشى ەلمەن ساۋدا-ەكونوميكالىق بايلانىس ورناتۋعا كۇش سالىپ جاتىر. ءبىرلەسكەن جوبالارىمىز بار. ال بۇگىنگى شارا – قايعىلى جاعدايدا مەرت بولعان 52 وزبەكستاندىقتىڭ رۋحىنا باعىشتالادى. تۋىسقان جۇرتتىڭ قايعىسىنا ورتاقتاسۋدى پارىز سانايمىز. سوندىقتان مۇنى رامازان ايىندا ۇيىمداستىرىپ وتىرمىز» دەدى ول.
ايتپاقشى, وتىرعىزىلعان كوشەتتەر باس شاھاردىڭ تابيعاتىن جەرسىنۋ ءۇشىن سولتۇستىك قازاقستان وبلىسىنان اكەلىنگەن.