تانىمال جۋرناليست, پرەزيدەنت گرانتىنىڭ يەگەرى, قازاقستاننىڭ ەڭبەك سىڭىرگەن قايراتكەرى قاينار ولجاي «Elorda Aqparat» مەدياسەرىكتەستىگى جۋرناليستەرىنە كەلىپ شەبەرلىك ساباعىن وتكىزدى.
«جازۋ جانە رەداكتسيالاۋ تەحنولوگياسى» ەكى كۇندىك سەمينار-ترەنينگىندە جاس جۋرناليستەر جازۋ, سويلەۋ, رەداكتسيالاۋ بويىنشا قۇندى مالىمەت الدى, تاجىريبەسىن شىڭدادى. پراكتيكالىق ساباق كەزىندە سايتقا, گازەتكە شىققان ماتەريالدار تالدانىپ, كەمشىلىكتەر تۇزەتىلدى, باعىت بەرۋ ماقساتىندا قاينار قالياقپارۇلى ءوز تاجىريبەسىمەن ءبولىسىپ, كەشەگى, بۇگىنگى زاماناۋي جۋرناليستيكادان ناقتى مىسالدار كەلتىردى. جۋرناليستيكاداعى ءتىل تازالىعى ءۇشىن كۇرەسىپ جۇرگەن قالامگەر وسى سالاعا قاتىستى كوپتەگەن وزەكتى ماسەلەنى قوزعادى.
– ءتىل ەشكىمگە كەرەك بولماي بارا جاتىر. ەڭ ۇلكەن دالەلىم – قازىرگى جاس جۋرناليستەردىڭ «ايتۋ كەرەك» دەگەندى «ايتۋ كەرەك-ءپىز», «بارۋىم كەرەكتى» «بارۋ كەرەك-ءپىز» دەپ ايتىپ, جازىپ جۇرگەنى. بۇل دۇرىس ەمەس. بۇعان جۋرناليستەر نازار اۋدارمايدى, ولارعا كەرەگى – اۋلەكى, جەلوكپە تاقىرىپتار, بىراق سونىڭ ءوزىن جەرىنە جەتكىزىپ, مايىن تامىزىپ جازا المايدى.ءتىلدىڭ ءوزىنىڭ نورمالارى بار, جۋرناليستەر سول تالاپتاردى ساقتامايدى. ءجۋرناليستىڭ ءوزى تىلدىك نورمانى ساقتاماسا, ءتىل تازالىعى ءۇشىن قالاي كۇرەسەدى؟! – دەيدى ول.
«Elorda Aqparat» مەدياسەرىكتەستىگى جۋرناليستەرى, كوررەكتورلارى ەكى كۇننىڭ ىشىندە بىلگىر, تاجىريبەلى پراكتيك جۋرناليستەن كوپ پايدالى نارسەنى ۇيرەندى, اقپاراتتارىنا قانىق بولدى. قازىر ەشبىر جۋرفاكتا بەرىلمەگەن, ايتىلماعان دۇنيەلەر رەداكتسياداعى تاجىريبەلى جۋرناليستەردى دە قىزىقتىرىپ, سەمينارداعى قىزىقتى ءدارىستى ۇزبەي تىڭدادى, قاجەتتى ساۋالدارىنا جاۋاپ الدى.
