ۇزاق جىلدار اقمولا وبلىستىق «ارقا اجارى» گازەتىندە ەڭبەك ەتكەن ءبادۋان يماشۇلىن قاۋمالاعان ورتاسى دا, قادىر تۇتار ارىپتەستەرى دە اقجارقىن دا ادال, ءوز ىسىنە شىن بەرىلگەن ەڭبەكقور ازامات رەتىندە تانيدى.
باكەڭ – وسى ءوڭىردىڭ قورعالجىن اۋدانىنىڭ تۋماسى. جازۋ-سىزۋعا ەرتە ارالاستى. «ارقالاعانى – التىن, جەگەنى – جانتىق» كاسىپ يەسى تۋعان جەردىڭ قادىر-قاسيەتىن, ونداعى ەڭبەك ادامدارىنىڭ تىنىس-تىرشىلىگىن اركەز قالامىنا ارقاۋ ەتتى. ءسۇيىپ تاڭداعان ماماندىعىنىڭ قىرى مەن سىرىن تەرەڭ مەڭگەرۋگە ۇمتىلدى. ەتكەن ەڭبەك پەن توگىلگەن تەر زايا كەتپەدى. تالاي جىلعى جەمىستى قىزمەتى ءۇشىن «قازاقستاننىڭ قۇرمەتتى ءجۋرناليسى» اتاعى مەن جامبىل اتىنداعى حالىقارالىق جانە قازاقستان جۋرناليستەر وداعى سىيلىقتارىنا يە بولدى.
«وتباسى – تاعدىر سىيلاعان كەرەمەتتەردىڭ ءبىرى» دەگەندەي, ءۇش بالا, بەس نەمەرە ءسۇيىپ, ولاردىڭ قىزىعىنا كەنەلىپ وتىرعان باكەڭ زايىبى گۇلجان عازيزقىزىمەن 1977 جىلى شاڭىراق كوتەرىپتى. جاس وتاۋدى ىڭگالاپ تۇڭعىشى ايدار شاتتىققا بولەدى. اراعا جىلدار سالىپ, ايدىن مەن كەنجە ۇلى ايبەك دۇنيە ەسىگىن اشتى. بۇگىندە بۇلاردىڭ بارلىعى ءوز الدارىنا وتاۋ قۇرعان ءبىر-ءبىر شاڭىراق يەلەرى.
– بالا تاربيەسىنە ءاۋ باستان ءمان بەردىم. ەكەۋمىز دە كوپ بالالى وتباسىنانبىز. پەرزەنتتەرىمنىڭ ۇشەۋى دە ۇل بالا بولعان سوڭ, جاس كەزدەرىنەن ءۇي شارۋاسىنا ارالاستىردىم. بالا كۇندەرىندە «بۇگىن اسۇيگە سەن كەزەكشىسىڭ, ەرتەڭ ءۇيدى سەن تازالاپ, قاعىپ, سىلكەسىڭ» دەپ تاپسىرما بەرەتىنمىن. ودان بالالارىم جامان بولعان جوق, قايتا ەڭبەكسۇيگىش, شارۋاعا يكەمدى بولىپ ءوستى. ۇشەۋى دە مۋزىكا مەكتەبىنىڭ تۇلەكتەرى, دومبىرانى جاقسى تارتادى» دەپ ەسكە الادى باكەڭ بالا تاربيەسى حاقىندا.
ال, زايىبى گۇلجان عازيزقىزىنىڭ ماماندىعى – دارىگەر. ول تسەلينوگراد مەديتسينا ينستيتۋتىن ءبىتىرىپ, قىرىق جىلدان استام ادام جانىنىڭ اراشاسى سانالاتىن كاسىپتىڭ ىستىعىنا كۇيىپ, سۋىعىنا توڭسا, سونىڭ جيىرما ەكى جىلىندا باس دارىگەر بولىپ قىزمەت ەتتى.
ەلدىڭ ەلەۋلىسى, حالىقتىڭ قالاۋلىسى اتانعان جوعارى ساناتتى دارىگەردىڭ جەتىستىكتەرى دە – ءبىر توبە. ستۋدەنت كەزىنەن كوزگە تۇسكەن اقجەلەڭدى ابزال جاننىڭ كەۋدەسىندە «قۇرمەت» وردەنى مەن «ەرەن ەڭبەگى ءۇشىن» جانە باسقا دا بەس مەدال جارقىرايدى. ەسىمى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ التىن كىتابىنا جازىلىپتى.
ۇلكەن ۇلى ايداردىڭ ماماندىعى زاڭگەر بولسا, ونىڭ جارى گۇلنار قارجىگەر ەكەن. ايدىن – ديپلومات, باكۋدەگى قازاقستان ەلشىلىگىندە قىزمەت ەتەدى.
ال, ايدىننىڭ كەلىنشەگى اسەل ەۋرازيا ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتىن ءبىتىرىپتى.
ايدار دا, ايدىن دا, ايبەك تە ورتا مەكتەپتە ۇزدىك وقىعان. قازىر ايبەك ەۋرازيا ۇلتتىق ۋنيۆەرسيتەتىنىڭ ماگيستراتۋراسىن وتە جاقسى تامامداپ, دوكتورانتۋرادا وقىپ ءجۇر. ونىڭ جارى ايجاننىڭ ماماندىعى – جۋرناليست. بۇگىندە ول تۇڭعىشتارى جانىبەكتىڭ تاربيەسىمەن اينالىسادى.
ءبادۋان اعا مەن گۇلجان اپاي قازىر بەس نەمەرەنىڭ قىزىعىنا بولەنىپ وتىر. ۇلكەن نەمەرەسى ايدانا قالاداعى №54 قازاق مەكتەپ-ليتسەيىندە وقيدى. سۋرەت سالۋعا قۇمار. مانەرلەپ بيلەۋدەن ءوز قۇربىلارى اراسىندا ءتۇرلى بايقاۋلارعا قاتىسىپ, جۇلدەلى ورىندار الىپ ءجۇر. ال, بيىل مەكتەپكە باراتىن ءامىرجان شاحماتتى جاقسى ويناپ كوزگە ءتۇسىپ جۇرسە, السۋ كوركەم گيمناستيكامەن اينالىساتىن كورىنەدى. ءاديا – بالاباقشانىڭ ونەرپازى.
سۇتتەي ۇيىپ وتىرعان وتباسىنىڭ بەرەكەلى بىرلىگىن كوپكە ۇلگى-ونەگە ەتە وتىرىپ, ولاردىڭ ۇرپاق تاربيەسىنە دە اسا ءمان بەرەتىنىن بايقايمىز. بالا-كەلىندەرىن يبا, ىزەتتى ساقتاۋ مەن سالت-ءداستۇردى قۇرمەتتەۋگە باۋلىعان ەرلى-زايىپتىلار ادامزاتقا ءتان بارلىق قۇندىلىقتاردى قاستەرلەي بىلەدى. ونىڭ ءبىر دالەلى ەكەۋى دە 2011 جىلى قاسيەتتى مەككەگە بارىپ, مۇسىلماننىڭ بەس پارىزىنىڭ ءبىرى – قاجىلىعىن وتەپ قايتتى.
ماۋەلى بايتەرەكتەي جايقالعان, شىرايلى شاڭىراق يەلەرىنىڭ عيبراتتى ءومىرى – قوعام ءۇشىن قاشان دا مەرەي.
ساعي ورال
