سانك-پەتەربۋرگتىڭ تورىنە ءسان-سالتاناتى كەلىسكەن قازاق اۋىلى قونباق. مۇندا قازاق حالقىنىڭ ەجەلگى تۇرمىسىنىڭ, سالت-ءداستۇرى مەن قولونەرىنىڭ تۋىندىلارىن قامتىعان جەتى بىردەي كيىز ءۇي تىگىلەدى. استانا قالاسىنىڭ سانك-پەتەربۋرگتەگى كۇندەرى وسىنداي كەرەگەسى كەڭ, ىرگەسى مىقتى, بەرەكەسى تاسىعان ەتنواۋىل كەلبەتىمەن اشىلماق.
اۋىلعا كىرە بەرىستە ەگەمەن ەلىمىزدىڭ تۋى جەلبىرەيتىن بولادى. بۇكىل ايماق شاعىن فورمالى ەسكەرتكىشتەر جانە تۇرمىستىق زاتتارمەن بەزەندىرىلمەك. شار تارىزدەس يننوۆاتسيالىق ءۇي دە وسى قاتاردان بوي تۇزەيدى. اۋىلدىڭ ناق ورتاسىندا ساحنا ورنالاسىپ, التىباقان قۇرىلادى.
بۇل كۇندەرى نەۆا جاعالاۋىنىڭ تۇرعىندارى قازاقتىڭ التىن قولدى زەرگەرلەرىنىڭ تۋىندىلارىن تاماشالاپ, حاس شەبەرلەردەن ءتالىم الىپ, ولارمەن بىرگە قىش قۇمىرا قۇيىپ, زەرلى شاشپاۋ جاساي الاتىن بولادى. ون ساۋساعى مايىسقان ىسمەرلەر كەستە تىگۋ, شي توقۋ, سىم شيراتۋ توقىما, كيىز باسۋ سەكىلدى ۇلتتىق ونەرىمىزبەن تانىستىرادى.
التى قاناتتى اق بوز ۇيلەردىڭ ءبىرى – اڭشىلار ءۇيى. قازاق اۋىلىنىڭ قوناقتارى سارىارقانىڭ قىران باپتاعان قۇسبەگىلەرىنىڭ ەجەلگى ساياتشىلىق داستۇرىمەن تانىسادى. تۇلكىگە قۇس سالۋدىڭ قىزىعىن تاماشالاۋشىلارعا دا تارتىمدى كورىنىس دايىندالىپتى.
ال, اسەم بەزەندىرىلگەن اقوردانىڭ دۋمانى وزگەشە. مۇندا قىز ۇزاتىپ, كەلىن تۇسىرگەن قازاقتىڭ «بەتاشار» تويىنىڭ تەاترلاندىرىلعان كورىنىسى قويىلماق.
«شالقىما» بي ءانسامبلى, «سارىارقا» حالىق اسپاپتارى ءانسامبلى تويدىڭ كورىگىن قىزدىرىپ, پەتەربۋرگتىق ورەندەرگە ەلوردالىقتاردىڭ جىر-شاشۋىن جەتكىزەدى. وسى كۇندەرى قويىلاتىن كونتسەرتتىك باعدارلامامىزدا ۇزدىكتەردىڭ ۇزدىگى ونەرىن ورتاعا سالماق. ءداستۇرلى ءانشى سەكەن سىزدىقوۆ, سىبىزعىشى ماحان شىعىس, قاراگوز گاسيموۆا جەتىگەندە ونەر كورسەتپەك.
سالتاناتتىڭ باستى قويىلىمى «قازاق ەلى» تەاترلاندىرىلعان كورىنىس بولماق. مۇندا قازاق حالقىنىڭ وتكەنى مەن بۇگىنى, قول جەتكەن بەلەستەرى مەن بولاشاققا ارتقان ارمان-ماقساتى انمەن اسقاقتاپ, كەلىستى سازبەن كەستەلەنگەن.
ايگۇل ۋايسوۆا
