جاڭادان تاعايىندالعان مادەنيەت جانە سپورت ءمينيسترى داۋرەن اباەۆ ەلورداداعى بىرقاتار سپورت نىساندارىمەن تانىستى.
مينيستر ق.مۇڭايتپاسوۆ اتىنداعى وليمپيادالىق رەزەرۆتەگى مامانداندىرىلعان رەسپۋبليكالىق مەكتەپ-ينتەرنات-كوللەدجىنە, «نۇر-سۇلتان قالاسى وليمپيادالىق دايارلاۋ ورتالىعى» كوپفۋنكتسيونالدى سپورت كەشەنىنىڭ بازاسىندا اشىلعان ۇلتتىق سپورت ۋنيۆەرسيتەتىنە, سونداي-اق «Qazaqstan» جەڭىلاتلەتيكالىق سپورت كەشەنىنە باردى.
مادەنيەت جانە سپورت ءمينيسترىنىڭ ورىنباسارى سەرىك جاراسباەۆ پەن اتالمىش مينيسترلىكتىڭ سپورت جانە دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ سپورت كەشەندەرىنىڭ جۇمىسىمەن تانىستىرىپ, الداعى جوسپارلارمەن ءبولىستى.
سپورتتىق نىسانداردى ارالاۋ بارىسىندا نۇر-سۇلتان قالاسىنداعى جوعارى جەتىستىكتەر سپورتى جانە دەنە شىنىقتىرۋ مەن بۇقارالىق سپورتتى دامىتۋ پەرسپەكتيۆالارى تالقىلاندى.
داۋرەن اباەۆ سپورتتىق ينفراقۇرىلىمدى دامىتىپ, بالالار مەن جاسوسپىرىمدەردىڭ ساپالى دايىندىق جۇمىستارىنا ەرەكشە ءمان بەرۋ كەرەكتىگىن ايتتى. سپورت ينفراقۇرىلىمىنىڭ قولجەتىمدىلىگى مەن ينكليۋزيۆتىلىگىنە ەرەكشە نازار اۋدارا وتىرىپ, دامىتۋ قاجەتتىگىن, نىسانداردى كادرلىق جانە ماتەريالدىق-تەحنيكالىق جابدىقتاۋ ماسەلەلەرىن باقىلاۋدا ۇستاۋ ماڭىزدىلىعىن اتاپ ءوتتى.
بايان اسىلبەكوۆا
