ءماجىلىستىڭ الەۋمەتتىك-مادەني دامۋ كوميتەتىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ, سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ تۋرالى» زاڭ جوباسىنىڭ تانىستىرىلىمى ءوتتى.
تۋريزم جانە سپورت ءمينيسترىنىڭ ورىنباسارى سەرىك جاراسباەۆ زاڭ جوباسى نەگىزگى ءتورت باعىتتى قامتيتىنىن ايتتى. ءبىرىنشىسى – سپورت تۇرلەرىنە باسىمدىق بەرۋ. قازاقستاندا قازىر سپورتتىڭ 180 ءتۇرى دامىتىلىپ جاتىر. سونىمەن قاتار تاۋەلسىزدىك جىلدارى 13 قىسقى وليمپيادالىق سپورتتىڭ 5 تۇرىنەن, 46 جازعى وليمپيادالىق سپورتتىڭ تەك 13 تۇرىنەن عانا وليمپيادالىق جۇلدەلەر الىپپىز.
جۇمىس توبىندا بىرقاتار ۇسىنىستارىمىزدى ايتتىق. سپورتتى تۇسىنەتىندەر, تۇسىنبەيتىندەر بار. 180 سپورتتى ەلدىڭ ءبارى ءتۇسىنۋى مۇمكىن ەمەس. سپورتتىڭ قىسقى, جازعى تۇرلەرى, پاراوليمپيادالىق سپورت, ۇلتتىق سپورت, بۇقارالىق سپورت دەگەن بار. وسى زاڭ جوباسىندا «رەسپۋبليكالىق فەدەراتسيا» دەگەنىمىز «ۇلتتىق فەدەراتسيا» بولىپ وزگەرەيىن دەپ تۇر. بۇل جەردە وليمپيادالىق, نەگىزگى سپورت تۇرلەرى قالادى. قالعانى وڭىرلەرگە كەتەدى. ءبىزدى الاڭداتىپ وتىرعانى – كوپ جىلدان بەرى تەر توگىپ جۇرگەن كوپتەگەن سپورتشىلار, سپورت فەدەراتسيالارىنىڭ باسشىلارى بار. ايلىعى شايلىعىنا جەتپەيدى. سولار «ەرتەڭگى كۇنى وليمپياداعا كىرمەيمىز. ءبىزدى ىسىرىپ تاستاي ما» دەپ الاڭدايدى. بىزدە ءبىر سالاعا قاتىستى زاڭ شىقسا قورقادى. ويتكەنى سىناۋشىلار كوبەيىپ كەتسە اقشانى دا توقتاتىپ تاستاۋى مۇمكىن. ەلدىڭ ءبارى وليمپيادالىق سپورتتى ءسۇيىپ, ونىمەن اينالىسپايدى. يا بولماسا وزدەرى تۇراتىن جەردە ونداي ۇيىرمەلەر بولماۋى مۇمكىن. وتە ۇلكەن ءارى جاقسى فەدەراتسيالار بار اۋقىمدى جۇمىستار اتقارىپ وتىرعان. سوعان ءمان بەرۋ كەرەك دەپ ويلايمىن.
قاراجاتتىڭ ورىنسىز جۇمسالىپ, جەلگە ۇشىپ جاتقانىن پرەزيدەنتتىڭ ءوزى ايتتى. وسىعان شەكتەۋ قوياتىن ۋاقىت كەلدى. زاڭ جوباسىندا سپورت سالاسىنا قاتىستى جاقسى, باتىل شەشىمدەر بار. باتىستا ۆەلوسپورتتى جوعارى باعالايدى. «استانا», «بارىس» حوككەي كلۋبتارى تۋرالى دا كوپ ايتىلادى. بۇل جاققا دا سپورتتىق قوردان كوپ قاراجات كەتىپ جاتىر. بىزدە دە مما دەيمىز عوي. وسى سالادا جۇمىس ىستەدىم. شاۆحات راحمونوۆ سياقتى الەمگە ايگىلى سپورتشىلارىمىز بار. مەملەكەتتەن قارجى الماي, ءوز دەمەۋشىلەرىنىڭ كومەگىمەن قازاقستاننىڭ بەدەلىن, ابىرويىن ميللياردتاعان اقشا العان سپورتشىلاردان دا جاقسى كوتەرىپ جاتىر. وزدەرىمەن وزدەرى دامىپ كەلەدى. دەمەك ءبارىمىز مەملەكەتكە قول جايىپ وتىرا بەرمەۋىمىز كەرەك. سپورت فەدەراتسيالارى دۇرىستاپ, شيراق جۇمىس ىستەۋى كەرەك. الدا پاريج وليمپياداسى كەلە جاتىر. وليمپيادادا ءۇمىت ارتاتىن سپورتشى تاپپاي وتىرمىز. ءبىزدىڭ سپورتشىلار جارتى جىل, ءبىر جىل سابىلىپ جۇرەدى. اكىمدىكتەرگە, بۇكىل بيزنەسمەندەرگە كىرەدى. كۇندە بىتپەيتىن توي. يدەولوگيا دەگەن وسى ما؟ نە بۇل؟ وسى جاعىنا دا ءبىر شەكتەۋلەر كەرەك دەپ ويلايمىن. سپورتشىلارىمىز سۇرامشاق بولسا, ەلدىڭ سپورتى قالاي داميدى؟ ويلانىپ كورەيىكشى, اعايىن.
دانيار قاسقاراۋوۆ,
ءماجىلىس دەپۋتاتى
