تابيعات اياسىنداعى تاربيە
بالالار جىلى اياسىندا ەلوردانىڭ ىرگەسىندەگى «سارىجايلاۋ» ەتنوگرافيالىق اۋىلىندا «قارا شاڭىراق» ۇلتتىق تاربيە بەرۋ مەكتەبىنىڭ ۇيىمداستىرۋىمەن «دارا» شەشەندىك وقۋ ورتالىعىنىڭ بالالارىنا ارنالعان «ەكوسوفيا. كيەلى تابيعات» تاقىرىبىنداعى رۋحاني-تانىمدىق ساباعى وتكىزىلدى. وعان نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ قاتىستى.
ءىس-شارانىڭ ماقساتى – بالانى تابيعاتتى سۇيۋگە, قورشاعان ورتانى قورعاۋعا, ەكولوگيالىق مادەنيەتكە ۇيرەتۋ, ادال ەڭبەكتىڭ ماڭىزىن ۇعىندىرۋ, كىتاپ وقۋعا باۋلۋ, كىتاپقا دەگەن قۇشتارلىعىن ارتتىرۋ, انا تىلىنە دەگەن قۇرمەت سەزىمىن قالىپتاستىرۋ, قابىلەتىن اشۋ, جان-جاقتى دامىتۋ.
بالالار ورمان ارالاپ, ساماۋرىن قايناتۋ ءۇشىن شىرشانىڭ ءبۇرىن, قۋراعان تال جينادى. تابيعاتتى قورعاۋعا ۇيرەنىپ, ۇلتتىق ويىندار وينادى. «ەرتەگى – ەل ەرتەڭى» جوباسى اياسىندا بالالارعا ەرتەگى وقىلدى, سىيلىققا ەرتەگى كىتاپتار تاراتىلدى. بالالارعا كيىز ءۇي, اتا-بابالارىمىزدىڭ تۇرمىس-تىرشىلىگى جايلى ماعلۇمات بەرىلدى. بالالار شەشەندىك ونەرىن كورسەتتى. ءىس-شاراعا 20 بالا جانە 10 اتا-انا قاتىستى.
«دارا» وقۋ ورتالىعىنىڭ ۇستازدارى مەن اتا-انالار دا «قارا شاڭىراق» مەكتەبىنىڭ ۇرپاقتىڭ رۋحاني-ونەگەلىك تاربيەسى جولىنداعى اتقارىپ وتىرعان جۇمىسىنا ريزاشىلىعىن ءبىلدىرىپ, بىرلەسىپ ىنتىماقتاستىقتا جۇمىس ىستەۋ جايلى ويىن جەتكىزدى.