بيىلعى ءساۋىر ايىندا ەلوردادا ءسان جانە ديزاين ستۋدياسى جۇمىسىن باستادى. مۇندا ءوز يدەيالارى مەن جوبالارىن جۇزەگە اسىرۋدى ارماندايتىن تالانتتى ديزاينەرلەر مەن سۋرەتشىلەر ءۇشىن ەسىك اشىق.
– بالا كەزىمدە مۋلتفيلم رەجيسسەرى نەمەسە سانگەر بولۋدى ارماندادىم. العاشقى كوللەكتسيانى 7-سىنىپتا كورسەتتىم. كەيىن مۇعالىمدەرىم مەن سىنىپتاستارىم مەكتەپتە العاشقى ءسان كورسەتىلىمىمدى وتكىزۋگە كومەكتەستى. مەكتەپتى بىتىرگەن سوڭ ت.جۇرگەنوۆ اتىنداعى اكادەمياعا گرانتقا وقۋعا ءتۇستىم, – دەيدى شىعارماشىلىق شەبەرحانانىڭ جەتەكشىسى اريا جۇنىسبەك.
21 جاسىندا ول لوندونداعى ونەر ۋنيۆەرسيتەتىنە وقۋعا ءتۇستى. ودان كەيىن قازاق ۇلتتىق ونەر ۋنيۆەرسيتەتىنىڭ ماگيستراتۋراسىن ءتامامدادى. «ۋنيۆەرسيادا-2017» گالا-كونتسەرتىنە, كاسپي تەڭىزى سامميتىنە كوستيۋمدەر دايىندادى. اريا جۇنىسبەك سەۋل ءسان اپتالىعىنا شەتەلدىك سانگەر رەتىندە شاقىرىلدى. باكۋدە ونەر اكادەمياسىندا شەبەرلىك ساباقتارىن وتكىزدى. ستامبۋلداعى ونەر ينستيتۋتىندا, ابۋ-دابيدە, ميلاندا ءسان كورمەلەرىندە بولدى.
– قازىر مەن بار كۇشىمدى بالالاردىڭ كاسىبي ديزاين جانە جازۋ داعدىلارىن دامىتۋعا جۇمسايمىن. باسىندا اقىلى كۋرستار اشتىق. بىراق كەيىنىرەك اتا-انالاردىڭ بالالارىنىڭ شىعارماشىلىق ءبىلىم الۋىنا اقشا تولەۋگە مۇمكىندىگى جوق ەكەنىن تۇسىندىك. اسىرەسە مۇمكىندىگى شەكتەۋلى بالالاردىڭ اتا-انالارىنا قيىنعا سوقتى. سوندىقتان وسىنداي بالالار ءۇشىن تەگىن توپ اشۋ يدەياسى كەلدى. قازىر ءبىزدىڭ شىعارماشىلىق ورتالىقتا 16 بالا بار. ونىڭ ۇشەۋى مۇمكىندىگى شەكتەۋلى جاندار. سونداي-اق بىزگە 6 زەينەتكەر كەلەدى, – دەپ ءبولىستى ونەر ستۋدياسىنىڭ جەتەكشىسى.
الەۋمەتتىك ورتالىقتا ەسكيز بەن اكسەسسۋارلاردى جاساۋدى جانە مودەلدەۋ بويىنشا نەگىزگى داعدىلاردى, سونىمەن قاتار سۋرەتكە ءتۇسۋدى, ماكياج جانە شاش ۇلگىسىنىڭ نەگىزدەرىن, سۋرەت سالۋ تەحنيكاسىمەن جۇمىس ىستەۋدى, سۋرەت سالۋدى جانە ت.ب. ۇيرەتەدى.
