تالابى تاۋداي «ءتاج»
ۇلتتىق اكادەميالىق كىتاپحانا جانىنان «ءتاج» (تاۋەلسىزدىك. ادەبيەت. جاستار) قالامگەرلەر كلۋبى قۇرىلدى! استانالىق جاستاردىڭ كوز قۋانىشىنا اينالىپ, ادەبيەتكە قۇشتارلىعىن ارتتىراتىن رۋحاني وشاقتىڭ جەتەكشىسى, جاس اقىن ەرلان جۇنىستەن جاڭا باستاما جايىندا سۇراعان ەدىك…
– ۇلتتىق اكادەميالىق كىتاپحانا وسى ۋاقىتقا دەيىن دە ىرگەلى ادەبي كەشتەردىڭ, باسقوسۋلاردىڭ ۇيىتقىسى بولىپ كەلگەن ەدى. ەندى جاڭا عانا ەسىگىن اشقان «ءتاج» كلۋبىمەن تانىستىرا كەتسەڭىز.
– راس ايتاسىڭ, ەلورداداعى ەڭ ۇلكەن كىتاپحانا قالامگەرلەردىڭ, اقىنداردىڭ شىعارماشىلىقتارىن ۇشتالۋىنا, كىتاپتارىنىڭ تۇساۋكەسەرلەرى جاسالۋىنا ارقاشان سەپتەسىپ, قاعىلەزدىك تانىتىپ كەلدى. بۇل ءۇردىس ءوز كەزەگىندە استانادا ادەبي ينتەلليگەنتسيانىڭ قالىپتاسۋىنا, جاستاردىڭ ناسيحاتتالۋى مەن ءبىر-ءبىرىن تانۋىنا سەپتىگىن تيگىزدى. ەندى وسى ءداستۇردىڭ جالعاستىعى رەتىندە «ءتاج» جاس قالامگەرلەر كلۋبى قۇرىپ وتىرمىز.
مادەنيەت پەن ونەردىڭ جاناشىرى, كىتاپحانا ديرەكتورى ءۇمىتحان مۇڭالباەۆانىڭ مۇرىندىق بولۋىمەن جۇمىسىن باستاعان كلۋبتىڭ ماقساتى – قالامگەرلەر مەن وقىرماندار اراسىندا التىن كوپىر بولۋ, جاس قالامگەرلەردىڭ شىعارماشىلىعىن ناسيحاتتاۋ, ادەبي-مادەني ينتەلليگەنتسيانىڭ باس قوسار ورتالىعىنا اينالۋ. وسى ۇدەدەن شىقساق, ويىمىزدىڭ جۇزەگە اسقانى, ءىسىمىزدىڭ جەمىسىن كورگەنىمىز, ارينە.
– بۇل كلۋب بۇرىنعى داستۇردەن وزگەشە نە ىستەيدى, ناقتى قانداي شارالاردى قولعا الماقسىزدار؟
– «ءتاج» كلۋبى, جاڭا ايتقانىمداي, جاس قالامگەرلەردىڭ باسقوسۋلارىن, شىعارماشىلىق كەشتەرىن, كىتاپتارىنىڭ تۇساۋكەسەرلەرىن, اۆتورلىق باعدارلامالاردى تۇراقتى تۇردە ۇيىمداستىراتىن بولادى. سونىمەن قاتار, قولتاڭبا كۇنىن, كىتاپ كورمەسىن, شەبەرلىك سىنىپتارىن وتكىزەدى. ماۋسىم اقىنىن, ماۋسىم جازۋشىسىن, ماۋسىم سىنشىسىن انىقتاۋدى دا نازاردان تىس قالدىرمايمىز. سياسى كەپپەگەن جاڭا كىتاپتاردى تالقىلاۋ دا ويىمىزدا بار. وزگە دە ايماقتارمەن بايلانىس جاساۋ ماقساتىندا ادەبي بەينە-كوپىرلەر, وزگە دە ايماق قالامگەرلەرىمەن كەزدەسۋ-كەشتەرىن وتكىزۋدى جوسپارلاپ وتىرمىز.
– العاشقى جيىنعا قاشان بارامىز سونىمەن؟
– «ءتاج» كلۋبىنىڭ العاشقى وتىرىسى ەرتەڭ ساعات 17.00-دە وتەدى. وندا كلۋبتىڭ تۇجىرىمداماسى مەن ستراتەگياسى, كودەكسى, كلۋب مۇشەلەرىن تىركەۋ جانە جىل سوڭىنا دەيىنگى جۇمىس جوسپارى (جاس قالامگەرلەردىڭ ءوز شەشىمىمەن) قابىلدانادى. تاعى ايتارىم, بۇل باستاما ادەبيەت ولكەسىندەگى جاستاردىڭ ءومىرىن ءسال دە بولسا قىزىقتىرىپ, سۇرقاي كۇندەرگە ءسال دە بولسا رەڭك بەرەتىنىنە سەندىرگىم كەلەدى.
– اڭگىمەڭىزگە راحمەت!
اسحات رايقۇل