ەلتاڭباعا وزگەرىس ەنگىزىلەدى
بۇرناعى كۇنى استانا قالاسى اكىمدىگى جانىنداعى مەملەكەتتىك رامىزدەر جونىندەگى كوميسسيانىڭ كەڭەيتىلگەن وتىرىسى ءوتتى. قالا اكىمىنىڭ ورىنباسارى ايدا بالاەۆا توراعالىق ەتكەن جيىندا مەملەكەتتىك ەلتاڭبانى پايدالانۋدىڭ ستاندارتىن ساقتاۋ ماسەلەسى تالقىلاندى.
باسقوسۋدى اشىپ, جۇرگىزىپ وتىرعان ا.عالىمقىزى بۇل ماسەلەنىڭ بۇعان دەيىن دە بىرنەشە مارتە كوتەرىلگەنىن ايتتى. «مەملەكەتتىك رامىزدەردى باسىپ شىعاراتىن ليتسەنزياسى بار مەكەمەلەر ۇلت نىشاندارىنىڭ باستاپقى نۇسقاسىنىڭ بۇزىلۋىنا جول بەرگەن. وسىنىڭ سالدارىنان ەلىمىزدە تۋدىڭ, ەلتاڭبانىڭ باستاپقى ستاندارتتان اۋىتقىعان نۇسقالارى پايدا بولدى. سوندىقتان اتالعان ماسەلە جوعارى قۇزىرلى ورگاندار تاراپىنان قارالىپ, ءتۇسىندىرىلىپ, جاڭا ستاندارت بەكىتىلدى» دەدى كوميسسيا ءتورايىمى. ايدا بالاەۆانىڭ ايتۋىنشا, مەملەكەتتىك ەلتاڭبانى پايدالانۋدىڭ جاڭا ستاندارتتارى 2015 جىلدىڭ
1 شىلدەسى مەن 2017 جىلدىڭ 1 شىلدەسى ارالىعىندا كۇشىنە ەنەدى. وسى ۋاقىت ارالىعىندا وندىرۋشىلەر ءوز ءونىمدەرىن وزگەرتىپ, بارلىق مەكەمەلەر ەلتاڭبانى پايدالانۋدىڭ جاڭا ستاندارتتارىنا كوشۋگە ءتيىس.
وتىرىس بارىسىندا قازاقستان ستاندارتتاۋ ينستيتۋتى ديرەكتورىنىڭ ورىنباسارى نۇرتاس وتەشەۆ ءسوز سويلەدى. «ۋاقىت وتە كەز كەلگەن مەملەكەتتىك تاڭبانىڭ وزگەرىپ, ەسكىرۋى – زاڭدىلىق. ەلتاڭبا دا سونداي. بۇل ستاندارتتاردى ەنگىزۋ جۇمىسى 2010 جىلى قولعا الىنعان بولاتىن. ناتيجەسىندە, نەگىزگى التى وزگەرىس ەنگىزىلدى. ولار ەلتاڭبانىڭ ءتۇرى, ءتۇسى, پىشىنىنە بايلانىستى. سونداي-اق, ءۇش جىل كەپىلدىك مەرزىمى دە بەكىتىلدى» دەدى ول.
جيىندا مەملەكەتتىك ەلتاڭبانىڭ اۆتورى جانداربەك مالىبەكوۆ ءوز قولىنان شىققان ءرامىزدىڭ قۇندىلىقتارىن اڭگىمەلەدى. «ەلتاڭبادا جەتپىس ەكى ۋىق بار. ونىڭ بىرەۋى كەم بولسا, ستاندارتتى ساقتاماعان بولىپ ەسەپتەلەدى. مۇيىزدەردىڭ جەتى ساقيناسى بار. بۇل ءار ۇرپاقتىڭ جەتى اتاسىن ءبىلۋ داستۇرىنە سايادى. كەرەگەلەردىڭ دە ورنالاسۋ تاسىلدەرى بار. ول قازاقتىڭ ۇعىمىندا ۇلكەن مانگە يە. ونىڭ بوساعاسى بار, بوساعاسىندا تۇرعان قيىقتارى بار, قوشقار مۇيىزدەر بار. سولاردىڭ بارلىعى ەلتاڭبامىزدىڭ قۋاتتى جانە قاسيەتتى ەكەندىگىن ءبىلدىرەتىن بەلگىلەر» دەدى ساۋلەتشى.
ەلتاڭبا قازاق حالقىنا جيىرما جىلدان بەرى قىزمەت ەتىپ كەلەدى. جاڭا ستاندارتقا سايكەس ول التىن تۇستەس, ال, استارى اسپان تۇستەس بولۋى كەرەك. سونىمەن قاتار ەلتاڭبانىڭ بولىكتەرىنىڭ قىرىققا جۋىق اتاۋى بار.
باسقوسۋ سوڭىندا مەملەكەتتىك ءرامىز وندىرۋشىلەرىمەن جەكە سەمينار وتكىزۋ تاپسىرىلدى. بۇل – ءونىمدى كەڭ تارالىمعا شىعارماس بۇرىن ءتۇسىندىرۋ جۇمىستارىن جۇرگىزىپ, قارجىنى ۇنەمدى پايدالانۋعا مۇمكىندىك بەرەدى. ايتا كەتۋ كەرەك, ەلىمىزدە مەملەكەتتىك رامىزدەردى شىعاراتىن قىرىق شاقتى مەكەمە تىركەلگەن.
اسحات رايقۇل