ۇلتتىق مۋزەيدە تاۋەلسىزدىكتىڭ 30 جىلدىعىنا وراي «گرافيكا جانە ءمۇسىن» زالى اشىلدى. ەكسپوزيتسيانى قۇرۋعا مۋزەي قورىنداعى قازاقستاننىڭ كاسىبي شەبەرلەرىنىڭ گرافيكالىق جانە مۇسىندىك تۋىندىلارى نەگىز بولدى.
زالدىڭ اشىلۋ سالتاناتىندا ءسوز سويلەگەن قازاقستان سۋرەتشىلەر وداعىنىڭ مۇشەسى قاليوللا احمەتجان ۇلتتىق مۋزەيدىڭ جالپى ونەرگە, سونىڭ ىشىندە كەسكىندەمە, گرافيكا مەن ءمۇسىن تۋىندىلارىنا ۇلكەن قولداۋ كورسەتىپ وتىرعاندىعىن اتاپ ءوتتى. ەكسپوزيتسيا ەلىمىزدەگى بەينەلەۋ ونەرى كاسىبي مەكتەبىنىڭ قالىپتاسۋ كەزىنەن باستاپ, بۇگىنگە دەيىنگى ديناميكاسىن كورسەتەدى.
نەگىزگى ايماقتا قازاقستاندا بەينەلەۋ ونەرى كاسىبي مەكتەبىنىڭ قۇرىلۋى جايلى باياندالدى. گرافيكا بويىنشا ە.سيدوركين, ا.دىنىكەەۆ, ءۇ.اجيەۆ, ن.اشتەم, س.ايتباەۆ, م.ەرجانوۆ, ءا.ىسمايىلوۆ, ا.اقاناەۆ, ق.زاكىروۆ, پ.انتونەنكو, ن.گاەۆ, ۆ.تولچينسكي سياقتى شەبەرلەردىڭ تۋىندىلارى ۇسىنىلسا, ال ءمۇسىن بويىنشا ق.نۇرباتىروۆ, ا.بيلىك, يۋ.بۋشترۋك, ە.مەرگەنوۆ, ە.سەرگەەۆ, ا.قۇماروۆ, د.سارسەكەەۆ, ن.مۋحاتاەۆا, پ.يۆانوۆ, ي.برودسكي, ە.كازارياننىڭ جانە تاعى دا باسقا شىعارماشىلىق يەلەرىنىڭ تۋىندىلارى قويىلدى.
زالدىڭ ورتالىق بولىگىندە زاماناۋي اۆانگارد اعىمىنىڭ ءبىر ءتۇرى رەتىندە قارۋ-جاراقتىڭ ءارتۇرلى بولىكتەرىنەن قۇرالعان تاق پەن ماسكا ينستاللياتسياسى ورنالاستىرىلعان.
