اقپارات جانە قوعامدىق دامۋ مينيسترلىگىنىڭ ازاماتتىق قوعام ىستەرى كوميتەتىنىڭ توراعاسى ماديار قوجاحمەت پەن «كازگيۋ» زاڭ كلينيكاسىنىڭ باسشىسى ەستەر بابادجانيان Elorda.Info تىلشىسىنە ۆولونتەر-زاڭگەرلەردىڭ حالىقتىڭ قۇقىقتىق مادەنيەتىن ارتتىرۋعا قالاي كومەكتەسەتىندىگى تۋرالى ايتىپ بەردى.
«ەرىكتىلەر جىلى اياسىندا ەلىمىزدە كوپتەگەن اكتسيا ءوتتى. وعان زاڭگەرلەر بەلسەندى قاتىستى. جالپى ادۆوكاتتار قاۋىمداستىعىندا مۇنداي قىزمەت تەك اكتسيالار مەن ولارعا ارنالعان ءىس-شارالار اياسىندا عانا قولدانىلمايدى. ازاماتتارعا كەشەندى الەۋمەتتىك زاڭ كومەگىن كورسەتۋگە قاتىسقان ادۆوكاتتار كليەنتكە زاڭ كومەگىنە جۇگىنگەن ساتتەن باستاپ ءىس بويىنشا قورىتىندى قۇقىقتىق شەشىم قابىلدانعانعا دەيىن كومەكتەسەدى», – دەيدى ماديار قوجاحمەت.
كوميتەت توراعاسى ۆولونتەرلىك جوبالار اياسىندا بازارلاردا, حقكو, «قازپوچتا» بولىمشەلەرىندە تەگىن قۇقىقتىق كونسۋلتاتسيالاردىڭ وتكىزىلگەنىن جانە ۆولونتەر-زاڭگەرلەردىڭ «سىبايلاس جەمقورلىققا قارسى ءىس-قيمىل نەگىزدەرى, سىبايلاس جەمقورلىققا قارسى مادەنيەتتى قالىپتاستىرۋ, «قۇقىقتىق ساۋاتتىلىق. بارلىعى مەنىڭ قۇقىقتارىم تۋرالى» تاقىرىبىندا ترەنينگتەردىڭ وتكىزگەنىن اتاپ ايتتى.
ماديار قوجاحمەتتىڭ ايتۋىنشا, قۇقىقتىق ماسەلەلەر بويىنشا كەڭەس بەرۋ شارالارىنا نوتاريۋستار دا, سوت ورىنداۋشىلارى دا, ءتىپتى, ستۋدەنتتەر دە قاتىسادى.
«وسى ورايدا, ستۋدەنت- زاڭگەرلەر تۋرالى جەكە توقتالىپ وتكىم كەلەدى. ءبىزدىڭ زاڭ ۋنيۆەرسيتەتتەرىمىز اتقارۋشىلىق ءىس جۇرگىزۋ سالاسىنداعى بارلىق وزەكتى ماسەلەلەر بويىنشا تەگىن قۇقىقتىق كونسۋلتاتسيالارىن ءجيى ۇسىنادى. بۇل رەتتە زاڭگەر-ستۋدەنتتەر قاجەتتى تاجىريبە السا, ال ازاماتتار قاجەتتى كومەك الادى», – دەپ اتاپ ءوتتى ماديار قوجاحمەت.
جەدەل زاڭ كومەگى
ەستەر بابادجانيان «كازگيۋ» جانىنداعى قۇقىق جوعارى مەكتەبى بازاسىندا قۇرىلعان زاڭ كلينيكاسىنىڭ جۇمىسى تۋرالى ايتىپ بەردى.
«بۇل ستۋدەنتتەردىڭ جەدەل مەديتسينالىق كومەككە ۇقساس العاشقى زاڭ كومەگىن ىسكە اسىرۋىنىڭ ءبىر ۇلگىسى. ستۋدەنتتەر زاڭ كلينيكاسىنداعى تاعىلىمداما اياسىندا كليەنتتەرگە كەڭەستەر بەرىپ, قۇقىقتىق سيپاتتاعى ءتۇرلى قۇجاتتاردى جاساۋ بويىنشا كومەكتەسەدى. بۇل تالاپ ارىزدارى, شاعىمدار, مەملەكەتتىك ورگاندارعا وتىنىشتەر, كەلىسىمشارت جوبالارى بولۋى مۇمكىن», – دەدى ەستەر بابادجانيان.
ونىڭ ايتۋىنشا, كەيبىر جاعدايلاردا ۆولونتەر-ستۋدەنتتەر سوتقا دەيىنگى كەزەڭدە تاراپتاردى تاتۋلاستىرۋعا كومەكتەسەدى. زاڭ كلينيكاسىندا وسىنداي كومەك تۇرىندەگى بىرقاتار ءساتتى جاعدايلار بار. بۇل كوبىنەسە ەڭبەك داۋلارى. ال بانككە قاتىستى داۋلار ازىراق.
ۆولونتەر كومەككە كەلدى
زاڭ كلينيكاسىنىڭ باسشىسى ستۋدەنت ارمان ومىربەكوۆتىڭ ازاماتشاعا اتقارۋشىلىق ءىس جۇرگىزۋ ساتىسىندا قالاي كومەك كورسەتكەنىن ايتىپ بەردى.
«2006 جىلى ەلوردانىڭ كوپبالالى تۇرعىنى تۋىستارىنىڭ ءوتىنىشى بويىنشا ءىرى كولەمدى نەسيە العان. ال جاقىندارى ول سومانى وزدەرى تولەيتىندەرىن ايتىپ سەندىرگەن. ناتيجەسىندە ولار ءوز مىندەتتەمەلەرىن ورىندامايدى, ايلىق تولەمدەردى كەشىكتىرەدى. ءسويتىپ, بانك ءىستى كوللەكتورلىق بيۋروعا بەردى. ال كوللەكتورلار ازاماتشادان قارىزدى ءوندىرىپ الۋ تۋرالى تالاپپەن سوتقا جۇگىنەدى. تالاپ قويۋشى سوتقا ارىزدى ۋاقىتىنان كەشىكتىرىپ بەرگەنىنە قاراماستان, ايەلدەن اقشانى تولىعىمەن ءوندىرىپ الادى. كەلىنشەككە سوت وتىرىسىنىڭ وتەتىن كۇنى مەن ورنى تۋرالى حابارلانبايدى. وسىعان بايلانىستى ول وتىرىسقا قاتىسا المادى جانە سوتقا تالاپ قويۋ مەرزىمىنىڭ ءوتىپ كەتكەنىن ايتا المايدى», – دەدى زاڭ كلينيكاسىنىڭ باسشىسى.
ەستەر بابادجانيانىڭ ايتۋىنشا, سوتتىڭ سىرتتاي شەشىمى نەگىزىندە كوپبالالى اناعا قاتىستى اتقارۋشىلىق ءىس جۇرگىزۋ قوزعالعان, ونىڭ اياسىندا ازاماتشانىڭ جەكە قاراجاتى عانا ەمەس, سونىمەن قاتار بالالارعا ارنالعان جاردەماقى دا وندىرىلگەن.
قۇقىقتىق ساۋاتتىلىق قورعادى
«ارمان ازاماتتىق ءىس ماتەريالدارىمەن تانىسۋ تۋرالى ءوتىنىش دايىندادى. ناتيجەسىندە ازاماتشا سوت شەشىمىمەن تەك وسى كۇنى عانا تانىسقانى تۋرالى قولحات جازدى. ستۋدەنت ءدال وسى قولحاتتىڭ نەگىزىندە سىرتتاي شەشىمنىڭ كۇشىن جويۋ تۋرالى ارىز دايىندادى. ونى سوت قاناعاتتاندىردى. ءسويتىپ, كوللەكتورلىق بيۋرونىڭ باستاپقى تالابى ءمانى بويىنشا قارالدى. ءبىزدىڭ ستۋدەنتپەن كەڭەسكەننەن كەيىن ايەل ەسكىرۋ مەرزىمىن قولدانۋ تۋرالى ءوتىنىش بەردى. سوت ونى دا قاناعاتتاندىردى. وسىلايشا, ارماننىڭ زاڭ اياسىنداعى ساۋاتتى ءىس-ارەكەتتەرىنىڭ ناتيجەسىندە كوپبالالى انانىڭ بۇزىلعان قۇقىقتارى قالپىنا كەلتىرىلدى. سوت شەشىمى ونىڭ پايداسىنا شىعارىلدى».
ستۋدەنتتەرگە – تاجىريبە, ازاماتتارعا – كومەك
ۆولونتەر-ستۋدەنتتەردىڭ تاجىريبەسىندە تۇرعىن ءۇي قۇرىلىسىندا ۇلەستىك قاتىسۋعا بايلانىستى جاعدايلار دا بولدى. مىسالى, ازامات قۇرىلىس كومپانياسىنان ءوز مىندەتتەمەلەرىن ورىنداماۋىنا بايلانىستى شىعىنداردى ۇزاق ۋاقىت بويى ءوندىرىپ الا الماعان. سودان كەيىن ستۋدەنتتەر تالاپ ارىزدى دايىنداپ, قالا تۇرعىنىنا شەشىم قابىلداعانعا دەيىن كونسۋلتاتسيا بەرىپ كەلدى. سوت ارىز بەرۋشىنىڭ بارلىق تالاپتارىن قاناعاتتاندىردى. كەيىننەن ۆولونتەرلەر وعان اتقارۋشىلىق ءىس جۇرگىزۋ ساتىسىندا دا كومەكتەستى. ستۋدەنتتەر كومەك پەن كونسۋلتاتسيا بەرۋدەن بولەك, جاستار اراسىندا قۇقىقتىق تاربيە مەن قۇقىقتىق ساۋاتتىلىقتى ارتتىرۋعا قاتىسادى.
«ءبىزدىڭ ستۋدەنت نۇرگۇل مۇحيت مەكتەپتەردە, تاربيە مەكەمەلەرىندە جانە بالاباقشالاردا شەبەرلىك ساباقتارىن وتكىزىپ تۇرادى. ول بالالارعا ويىن تۇرىندە, ال اتا-انالارعا ينتەراكتيۆتى تۇردە وتەدى. ستۋدەنتتەردىڭ ىشىنەن الفيا ساعىندىقوۆا, نافوساتحون داۆرونبەكوۆا, الۋا سەكىشەۆا جانە سىرىم مولدابەك سوتتار مەن تاتۋلاسۋ ورتالىعىنىڭ بازالارىندا ۇلكەن جۇمىس اتقارۋدا. جەتكىلىكتى تاجىريبەلەرى بار بۇل ۆولونتەرلەر كليەنتتەرگە اۋىزشا كەڭەس بەرە الادى جانە قۇجاتتاردى تاپسىرۋعا كومەكتەسەدى. بالالار ءۇشىن بۇل تاجىريبە, ال جوعارى وقۋ ورىندارى ءۇشىن بۇل ستۋدەنتتەردە زاڭگەردىڭ الەۋمەتتىك جاۋاپكەرشىلىگىنە تاربيەلەۋ بولىپ تابىلادى», – دەپ ءسوزىن قورىتىندىلادى ەستەر بابادجانيان.
