باقىت سۇلتانوۆتىڭ توراعالىعىمەن نۇر-سۇلتان اكىمدىگىنىڭ كەزەكتى وتىرىسى ءوتتى, وندا قالا تىنىس-تىرشىلىگىنىڭ ماڭىزدى ماسەلەلەرى تالقىلاندى, دەپ حابارلايدى ەلوردا اكىمدىگىنىڭ رەسمي سايتى.
بەلگىلەنبەگەن جەردەگى قوقىس ورىندارىن جويۋ تۋرالى بايانداعان قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى مۇسا تاناباەۆ قالا اۋماعىندا 185 رۇقسات ەتىلمەگەن قوقىس تاستايتىن ورىن انىقتالعانىن مالىمدەدى (الماتى – 44, بايقوڭىر – 50, ەسىل – 54, سارىارقا – 37). ونىڭ 122-ءسى جويىلدى (الماتى – 16, بايقوڭىر – 46, ەسىل – 23, سارىارقا – 37), 63-ءى جويۋ بارىسىندا (الماتى – 28, بايقوڭىر – 4, ەسىل – 31).
باقىت سۇلتانوۆ رۇقسات ەتىلمەگەن قوقىس ۇيىندىلەرىنىڭ پايدا بولۋىن بولدىرماۋ باعىتىندا زاڭناماعا وزگەرىستەر ەنگىزۋ جونىندەگى جۇمىستاردى قىسقا مەرزىمدە اياقتاۋدى تاپسىردى. سونىمەن قاتار قالا اكىمى ءوندىرىس قالدىقتارى مەن تۇرمىستىق قالدىقتاردى جيناۋ ورىندارىن ۇيىمداستىرۋ, جاڭا قوقىس تاستايتىن جەرلەردىڭ پايدا بولۋىنا جول بەرمەۋ, «سەرگەك» باقىلاۋ كامەرالارىمەن قالا اۋماعىن بارىنشا تولىق قامتۋ, تالداۋ جانە بولجاۋ جۇمىستارىن جالعاستىرۋ ءجونىندە ۇسىنىستار ەنگىزۋدى جۇكتەدى.
بۇدان كەيىن اۋدان اكىمدەرى پروبلەمالىق ۇيلەر تۋرالى باياندادى. 2018 جىلدىڭ 18 ماۋسىمىنان باستاپ 2019 جىلدىڭ 16 مامىرىنا دەيىن 109 قىزمەتىنە پيك ماسەلەلەرى بويىنشا 27 288 ءوتىنىش كەلىپ تۇسكەن. ولاردىڭ 21 185-ءنىڭ ماسەلەسى شەشىلسە, 205-ءى ءالى دە قاراستىرىلۋ ۇستىندە.
«بۇرىنعىداي, كوپپاتەرلى تۇرعىن ۇيلەردى سۋمەن جابدىقتاۋ (12 000 ءوتىنىش), جىلۋمەن جابدىقتاۋ (4 500), ەلەكترمەن جابدىقتاۋ (4000) ماسەلەلەرى شەشىلۋدە» دەدى نۇر-سۇلتان قالاسى اكىمىنىڭ ورىنباسارى ارمان تۇرلىبەك.
بۇل تۇرعىدا باقىت سۇلتانوۆ جاۋاپتى ماماندارعا جىلىتۋ ماۋسىمى باستالعانعا دەيىن 134 پروبلەمالى (يەسىز) تۇرعىن ۇيگە قىزمەت كورسەتەتىن ۇيىمداردى قۇرۋ بويىنشا جول كارتاسىن ازىرلەپ, بەكىتۋدى تاپسىردى.
