«بومبا قويىلدى!». «اۋەجايدا جارىلعىش زات بار!». «ۆوكزال جارىلادى!». تىلدىك قورىمىزدا «تەلەفون-تەرروريست» دەگەن ۇعىم پايدا بولدى. ادەتتە, مۇنداي حابارلامالار ازاماتتاردىڭ ءومىرى مەن دەنساۋلىعىنا شىنايى قاۋىپ تۋدىرۋ ءۇشىن ەمەس, مەكەمەلەردىڭ, كاسىپورىنداردىڭ جانە قوعامدىق كولىكتەردىڭ جۇمىسىن ۋاقىتشا توقتاتۋ, ادامدارعا قورقىنىش سەزىمىن ۇيالاتۋ ماقساتىندا جاسالادى. الايدا, باس-اياعى بەس سەكۋندتىق وسى ءتارىزدى ءبىر تەلەفون-حابارلامانىڭ ءوزى مەملەكەتتىك بيۋدجەتكە شامامەن 500 مىڭ تەڭگە شىعىن كەلتىرەدى ەكەن.
ويتكەنى, اقپاراتتىڭ اق-قاراسىن انىقتاۋ ءۇشىن بۇكىل قۇزىرلى مەكەمەلەر, ىشكى ىستەر, ۇلتتىق قاۋىپسىزدىك ورگاندارىنىڭ ارناۋلى قىزمەتتەرى, توتەنشە جاعدايلار جونىندەگى مينيسترلىكتىڭ قۇتقارۋ بولىمشەلەرى, جەدەل مەديتسينالىق جاردەم بريگادالارى جۇمىلادى. باقىلاۋعا الىنعان نىساننىڭ وندىرىستىك قىزمەتى نەمەسە ونداعى وقۋ پروتسەستەرى توقتاتىلادى. وعان قوعامدىق كولىكتەر مەن اۋە رەيستەرىنىڭ توقتاپ قالۋى سالدارىنان كەلەتىن شىعىندى قوسىڭىز.
ىشكى ىستەر مينيسترلىگى تاراتقان اقپاراتقا سۇيەنسەك, وتكەن جىلى ەلىمىزدە تەلەفون-تەرروريستەرىنە قاتىستى 135 دەرەك تىركەلىپتى. لاڭكەستىككە قاتىستى اقپار تاراتقان 100 ادام قولعا ءتۇسىپ, 58-ءى قىلمىستىق جاۋاپكەرشىلىككە تارتىلعان. تەلەفون-تەرروريستەر كوبىنە حالىق كوپ جۇرەتىن قوعامدىق ورىنداردى نىساناسىنا الادى ەكەن. الەۋمەتتىك زەرتتەۋلەرگە قۇلاق تۇرسەك, 37,2 پايىزى ۆوكزال, اۋەجاي جانە كولىك بەكەتتەرىندە, 24,8 پايىزى دەمالىس جانە ويىن-ساۋىق ورىندارىندا, 18,6 پايىزى اكىمشىلىك عيماراتتاردا, 16 پايىزى وقۋ ورىندارىندا, 15,1 پايىزى تۇرعىن ۇيلەردە جارىلعىش زات بار دەپ دابىل قاققان. تاعى ءبىر دالەلدەنگەن مالىمەت, دابىل قاعۋشىلاردىڭ دەنى ەر ادامدار ەكەن جانە ولاردىڭ 30 پايىزى مۇنداي قادامعا ماس كۇيىندە بارعان.
ءدۇيىم ەلدى دۇرلىكتىرەتىندەردىڭ اراسىندا وڭ-سولىن تانىماعان جاستار دا از ەمەس. مامانداردىڭ ايتۋىنشا, مۇنداي قادامعا بارعان جانداردىڭ كوبىنىڭ ايتار سىلتاۋلارى كوڭىلگە قونبايدى. ماسەلەن, ءبىرى ۇشاقتان كەشىگەتىن بولعان سوڭ «اۋەجايدا بومبا بار» دەپ حابارلاعان, ءبىرى ساباققا دايىندىقسىز كەلگەندىكتەن «مەكتەپ جارىلادى» دەپ دابىل قاققان, ال تاعى ءبىرى پوليتسەيلەردىڭ جەدەلدىگىن تەكسەرمەك بولعان. ءتىپتى, نە ءۇشىن بۇلاي جاساعانىن ءتۇسىندىرىپ بەرە الماعاندار دا بولىپتى. تاعى ءبىر قىزىعى, ولاردىڭ كوبى وزدەرىنىڭ ارەكەتىن قىلمىس دەپ سانامايدى ەكەن.
بۇعان دەيىن تەرروريزم اكتىلەرى تۋرالى قاساقانا جالعان حابارلاما بەرۋ «اۋىرلىعى ورتاشا قىلمىس» تۇرىنە جاتاتىن جانە ەكى جۇزدەن بەس ءجۇز ايلىق ەسەپتىك كورسەتكىشكە دەيىنگى مولشەردە ايىپپۇل سالىناتىن. كەلتىرىلگەن زياننىڭ مولشەرىنە قاراي ءبىر جىلدان ەكى جىلعا دەيىنگى مەرزىمدە ەڭبەكپەن تۇزەۋ كولونيالارىندا نەمەسە ءتورت جىلعا دەيىنگى مەرزىمدە قاتاڭ رەجيمدە باس بوستاندىعىنان ايىرىلاتىن. بىراق سوڭعى ەكى جىلدان بەرى جالعان تەرروريستەرگە قاتىستى جاۋاپكەرشىلىك قاتاڭداتىلدى. بيۋدجەتكە كەلتىرگەن شىعىنىنا قاراي جالعان اقپارات تاراتقان جان 200-دەن 500 ايلىق ەسەپتىك كورسەتكىشكە دەيىن ايىپپۇل تولەيدى. بۇل – 300-900 مىڭ تەڭگەنىڭ اينالاسى. ول از دەسەڭىز, 3 جىلدان 8 جىلعا دەيىن باس بوستاندىعىنان ايىرادى. بىراق قاراپايىم حالىق اراسىندا ءتۇسىندىرۋ جۇمىستارى ءالى دە جەتكىلىكسىز ءتارىزدى. بەيبىت كۇندە حالىقتىڭ ۇرەيىن الاتىن بۇزاقىلاردىڭ قاتارى ازايماي وتىرعانى دا سوندىقتان.
گۇلميرا ايماعانبەت
