قازاقستان رەسپۋبليكاسى تاۋەلسىزدىگىنىڭ 25 جىلدىعى جانە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 20 جىلدىعى اياسىندا اتالعان جوعارى وقۋ ورنىندا كورنەكتى مەملەكەت جانە قوعام قايراتكەرى, قازاق تەلەۆيزياسىنىڭ نەگىزىن قالاۋشىلاردىڭ ءبىرى, تەلەدراماتۋرگ, پۋبليتسيست-جازۋشى سۇلتان ورازالىنىڭ 75 جاسقا تولۋىنا ارنالعان «قازاق رۋحانياتىنىڭ ساردارى» اتتى شىعارماشىلىق كەشى ءوتتى. جاقسى مەن جايساڭ جينالعان كەشتە ايتىلعان لەبىزدەر لەگى قر مەملەكەتتىك حاتشىسى گۇلشارا ابدىقالىقوۆانىڭ مەرەيتوي يەسىن قۇتتىقتاۋ حاتىمەن باستالدى.
سۇلتان ورازالى 1964-1984 جىلدارى قازاق تەلەۆيزياسىندا رەداكتور, اعا رەداكتور, باس رەداكتور قىزمەتىن اتقاردى. وسى جىلدارى ونىڭ قالامىنان جۇزدەگەن ادەبي تەلەستسەناريلەر مەن تەلەپەسالار تۋىپ, كوگىلدىر ەكرانعا شىعارىلدى. اسىرەسە, «سۇحبات», «قىمىزحانا», «كەزدەسۋ», «شۇعىلا», «ايتىس», «حالىق قازىناسى» سىندى ۇلتتىق باعدارلامالاردىڭ اۆتورى ءارى جۇرگىزۋشىسى بولا ءجۇرىپ, عابيت مۇسىرەپوۆ, عابيدەن مۇستافين, ءىلياس ەسەنبەرلين, تاحاۋي احتانوۆ سىندى قازاق ادەبيەتى الىپتارىنىڭ اسىل بەينەلەرىن تاسپاعا قالدىردى. «ادامزاتتىڭ ايتماتوۆى» اتانعان قىرعىز جازۋشىسى شىڭعىس ايتماتوۆپەن دە سۇحباتتاستى. وسى سۇحباتتاردىڭ ءبارى قازىر قازاق تەلەۆيزياسىنىڭ التىن قورىندا حاتتاۋلى تۇر.
سۇلتان ورازالىنىڭ تەلەۆيزيا سالاسىنداعى ەڭبەگى ۇلتقا قىزمەت ەتەتىن ۇلكەن مۇراعا اينالىپ, شەجىرەلىك سيپات الىپ كەتتى. قالامداس ءىنىسىنىڭ مەرەيتويىنا وراي الىستان ات ارىتىپ جەتكەن اكادەميك سەرىك قيراباەۆ قوعام قايراتكەرىنىڭ شىعارماشىلىق جانە ازاماتتىق كەلبەتىنە توقتالىپ, يىعىنا قازاقى سالتپەن شاپان جاپتى.
مەرەيتوي يەسى كوپ جىل مەملەكەتتىك قىزمەت اتقارىپ, تاۋەلسىزدىگىمىزدىڭ نىعايۋىنا سۇبەلى ۇلەس قوستى. ماسەلەن, ءتىل كوميتەتىنىڭ تۇڭعىش توراعاسى بولدى. 1998 جىلدىڭ قاڭتارىندا اۆتورلىق قۇقىق جونىندەگى اگەنتتىگىنىڭ توراعاسى قىزمەتىنە تاعايىندالىپ, استاناعا كەلگەن زيالى قاۋىمنىڭ باسى بولىپ, باس قالامىزدىڭ قالىپتاسۋ كەزەڭىن كوزىمەن كوردى. استانا تۋرالى تولعانىسى كەش بارىسىندا كورسەتىلگەن شاعىن بەينەفيلمدە قامتىلدى. تاياۋدا رەسپۋبليكالىق «ونەگەلى ءومىر» سەرياسىمەن «سۇلتان ورازالى» كىتابى جارىق كوردى. جيىن بارىسىندا سونىڭ تانىستىرىلىمى ءوتىپ, جينالعاندار كىتاپ كەيىپكەرى تۋرالى ساليقالى پىكىر ءوربىتتى.
امانعالي قالجانوۆ
