تەڭگە – ەڭ ادەمى بانكنوت

ۇلتتىق ۆاليۋتا كۇنى مەن قارجى جۇيەسى قىزمەتكەرلەرىنىڭ كاسىبي مەرەكەسىنە وراي سالتاناتتى جيىن ءوتتى.

سالتاناتتى شارادا العاشقى بولىپ ءسوز العان استانا قالاسى اكىمىنىڭ ورىنباسارى اسقار امرين قالالىق اكىمدىك اتىنان استانالىقتار مەن قارجى سالاسىنىڭ قىزمەتكەرلەرىن ءتول مەرەكەمەن قۇتتىقتادى. قارجىگەرلەردىڭ ەل ەكونوميكاسىن دامىتۋ مەن نىعايتۋدا ماڭىزدى ءرول اتقاراتىنىن اتاپ وتكەن ول ەلوردا اكىمى باقىت سۇلتانوۆتىڭ قۇتتىقتاۋ حاتىن وقىپ بەردى.
«قۇرمەتتى ارىپتەستەر! سىزدەردى ۇلتتىق ۆاليۋتا, تەڭگە كۇنىمەن جانە قارجى سالاسى قىزمەتكەرلەرىنىڭ كاسىبي مەرەكەسىمەن شىن جۇرەكتەن قۇتتىقتايمىن! بۇل – ەرەكشە مەرەكە. وسىدان تۋرا 25 جىل بۇرىن ءدال وسى كۇنى ەل تۇرعىندارىنىڭ ءتول تەڭگەنى قولدارىنا ۇستاعان كەزىندە قازاقستاننىڭ تاۋەلسىز ەل بولعانىن شىنايى سەزىنگەن ەدىك. بىزدە تەك ءتول تەڭگەمىز عانا ەمەس, الەمدەگى ەڭ ادەمى قاعاز اقشاسى پايدا بولدى. 2011 جىلى «ەڭ ادەمى بانكنوت» رەتىندە 10 000 تەڭگەلىك, ال 2012 جىلى «ەڭ ۇزدىك بانكنوت» رەتىندە 5 000 تەڭگەلىك قاعاز اقشا ماراپاتتالسا, 2014 جىلى 1000 تەڭگەلىك قاعاز اقشا «الەمنىڭ ۇزدىك ۆاليۋتاسى» اتاندى» دەلىنگەن قالا باسشىسىنىڭ قۇتتىقتاۋ حاتىندا.
سونىمەن قاتار قالا اكىمىنىڭ ورىنباسارى قارجى سالاسىنىڭ ۇزدىك قىزمەت­كەرلەرى مەن بىرقاتار ارداگەرلەرىن قۇرمەت گراموتاسىمەن جانە العىس حاتتارمەن ماراپاتتادى. سالتاناتتى جيىن سوڭى مەرەكەلىك كونتسەرتكە ۇلاستى.