قازاق تىلىنە مەملەكەتتىك مارتەبە بەرىلگەنىنە تابانى كۇرەكتەي 30 جىلعا اياق باستى. ەلباسى مىنبەر سايىن تىلگە تيەك ەتتى, قىرۋار قارجى جۇمسالدى. ۇكىمەت ايتسا «ءبارى بولىپ جاتىر, ءبارى ءبىتىپ جاتىر, 2025 جىلى قازاقستان حالقى 100 پايىز قازاقشا سويلەيتىن بولادى» دەيدى.
ناتيجەسى قايدا؟ ناتيجەسى – قاعاز بەتىندە عانا. «تىلدەردى دامىتۋ» جونىندەگى سوڭعى باعدارلاما بويىنشا 2020 جىلى قازاقستان حالقىنىڭ 95 پايىزى قازاقشا سويلەۋگە ءتيىس. مەكتەپ قازاقشا سويلەمەي, حالىق قالاي قازاقشا سويلەمەك؟! پارلامەنت قازاقشا سويلەمەسە, قايمانا جۇرتتىڭ قازاقشاسىنان نە قايىر؟! 30 جىلدا قازاقشا دايىندالعان جالعىز عانا زاڭ قابىلداعان (اكىم ىسقاقتىڭ «كوشى-قون تۋرالى» زاڭى) پارلامەنتكە نە ايتپاقپىز؟!
مەكتەپ قازاقشا سويلەمەي جاتىر دەپ كىم ايتادى؟ لاۋازىمدىلار وسىلاي دەپ دۇرسە قويا بەرەدى. «بۇگىندە ەلورداداعى 88 مەكتەپتىڭ تەڭ جارتىسى – ارالاس مەكتەپ. ءبىر ارالاس مەكتەپتەگى 110 سىنىپتىڭ 97-ءسى – ورىسشا, ساباعى ورىسشا, وقۋشىسىنىڭ باسىم بولىگى – قازاق بالالارى.
بىراق جاعى تالمايتىن جانى قازاق, زار جاق قايراتكەرلەر تاعى دا تالاپ ەتىپ جاتىر. سەنات دەپۋتاتى مۇرات باقتيارۇلى بيىك مىنبەردەن ايقايلادى, «ماجىلىستەن قارالاتىن بارلىق زاڭ قازاق تىلىندە ازىرلەنسىن!». بىراق حاكىم ابايدىڭ ءسوزىن قايتالاعان «باياعى جارتاس» مۇراتتىڭ ءسوزىن دە قايتالامايتىنىنا كىم كەپىل؟!
قازاقتىلدى اقپارات, ءباسپاسوز جۋرناليستەرى دە باسىن كوتەردى. ولاردىڭ ايتۋىنشا, مينيسترلىكتەردىڭ قىزمەتكەرلەرىنەن قازاقشا ءتىل قاتاتىندار كوپ ەمەس. سوندا قازاق ءتىلىنىڭ كوسەگەسى قاشان كوگەرەدى؟
بوداۋحان توقانۇلى
