قازاقستان حالقى اسسامبلەياسىنىڭ استانا قالالىق وكىلدىگىنىڭ قولداۋىمەن «ءبىزدىڭ وتانىمىز – ماڭگىلىك قازاقستان!» اتتى جاس سۋرەتشىلەر بايقاۋى ءوتتى.
تاۋەلسىزدىك مەرەكەسىنە وراي وتكىزىلگەن بايقاۋعا 40-قا جۋىق جاس قىلقالام شەبەرى قاتىستى. ولار ءوز تۋىندىلارىندا, اسىرەسە, تاۋەلسىزدىك العاننان بەرى باس قالامىزدىڭ سيمۆولىنا اينالعان ءزاۋلىم عيماراتتار, كوركىنە كوز تويمايتىن اسەم تابيعاتى, جازىق دالا سىندى كورىنىستەردى بەينەلەگەن. 6 مەن 15 جاس ارالىعىنداعى سۋرەت سالۋعا قۇشتار جەتكىنشەكتەر تۋىندىلارىن گۋاش, اكۆارەل سىندى ءتۇرلى بوياۋلارمەن سالعان. ال وسى كونكۋرستى ۇيىمداستىرۋشىلاردىڭ ءبىرى نۇركەن ابدىعاليۇلى مۇنداي شارانىڭ قاتىسۋشىلارعا بەرەر پايداسى مول ەكەنىن, جاستاردى پاتريوتتىققا تاربيەلەۋگە جانە تالانتتاردى بارىنشا جان-جاقتى قولداۋعا سەپتىگىن تيگىزەتىنىن ايتادى.
وسىمەن ءتورتىنشى جىل وتكىزىلگەن بايقاۋ ناتيجەسىندە جۇزدەن جۇيرىك اتانعان جەڭىمپازدارعا ارنايى ديپلومدار مەن باعالى سىيلىقتار تابىس ەتىلدى. ماسەلەن, I ورىندى ادەليا ءجۇنىسوۆا, II ورىندى نارگيز ماراتوۆا, III ورىندى اسقار تۇراشەۆ يەلەندى. سونداي-اق بارلىق قاتىسۋشىلار سەرتيفيكاتتارمەن ماراپاتتالدى. شارا سوڭى مەرەكەلىك ءان-شاشۋعا ۇلاستى.
سابينا كاكىمجان
