كەشە «استانا – ادالدىق الاڭى» جوباسىنىڭ مەنەدجەرلەرى «نۇرلى جەر-2025» باعدارلاماسى اياسىندا ەلوردادا جوندەلىپ جاتقان ۇيلەردى تەكسەردى. جوندەۋ جۇمىستارىمەن اتالمىش باعدارلاما وپەراتورى «وركەن قالا» جشس وكىلدەرى تانىستىردى.
باس قالاداعى كوپپاتەرلى تۇرعىن ۇيلەردى جوندەۋگە رەسپۋبليكالىق بيۋدجەتتەن 600 ملن تەڭگە شاماسىندا قارجى ءبولىندى. باعدارلاما شەڭبەرىندە 19 تۇرعىن ءۇي جاڭعىرتىلادى. مەردىگەرلەر اتقارىلاتىن جۇمىستارعا ءۇش جىلعا كەپىلدىك بەرىپ وتىر.
تەكسەرىلگەن العاشقى نىسان «سامال» شاعىن اۋدانىندا ورنالاسقان №5 ءۇي. مۇندا ليفت جابدىقتارىن اۋىستىرۋ جۇرگىزىلىپ جاتىر. جالپى العاندا اتالمىش شاعىن اۋداندا جەتى ليفت قوندىرعىلارىن اۋىستىرۋ جوسپارلانعان. ءتيىستى جۇمىستار قىركۇيەك ايىنىڭ ورتاسىندا باستالدى. ولاردى اياقتاۋ مەرزىمى جەلتوقسان ايىنا قويىلعان. قاجەتتى جاڭا جابدىقتار ساتىپ الىنىپ, قويمالاردا تۇر.
ال ن.تىلەنديەۆ, 36 مەكەنجايىندا ينجەنەرلىك جەلىلەر اۋىستىرىلىپ جاتىر. بۇل تۇرعىن ءۇي ازىرگە اۆتونومدى جىلىتۋ جۇيەسىنە قوسىلعان. جەلىلەر اۋىستىرىلعان سوڭ, ءۇيدى ورتالىق جىلۋ جۇيەسىنە قوسادى. كەستە بويىنشا جۇمىس قاراشا ايىنىڭ اياعىندا اياقتالۋى ءتيىس.
