تۇرعىندار تىلەگىنە نازار سالدى
كەشە ەلوردا اكىمدىگىنىڭ جانىنداعى «استانا» كونتسەرت زالىندا قالا تۇرعىندارىن قابىلداۋ كۇنى ءوتتى. بۇل جيىننىڭ ەرەكشەلىگى سول, كەز كەلگەن ازامات كىرىپ, كوكەيىندە جۇرگەن ساۋالدارىنا جاۋاپ الا الدى.
اۋدان اكىمدىكتەرى, ءتۇرلى باسقارمالار مەن ۇيىمداردىڭ وكىلدەرى قاتىسقان ءىس-شارادا ءبىرنەشە مەكەمەنىڭ مۇشەلەرىنە جۇگىنىپ, ءوز ساۋالدارىمىزدى قويدىق.
جاقىندا بەس بالاسىنان ءبىر تۇندە ايىرىلىپ, قارا جامىلعان وتباسىنىڭ جايى بۇكىل قازاقستاندى جىلاتتى. وسى ماقساتتا قازىر قانداي شارالار قولدانىپ جاتقانى كوپشىلىكتى قىزىقتىرعانى انىق. وسىنى بىلمەك ماقساتىندا استانا قالاسىنىڭ توتەنشە جاعدايلار دەپارتامەنتى جايعاسقان ورىنعا قاراي اياڭدادىق.
– شىنىن ايتۋ كەرەك, ءبىز جوسپارمەن جۇمىس ىستەپ كەلەمىز. ءاربىر جىلۋ بەرۋ ماۋسىمىندا, ودان بولەك كۇنارا تۇرعىن ءۇي سەكتورلارىن ارالاپ, تەكسەرىپ شىعۋ نازاردان تىس قالعان ەمەس. ال جاقىندا كوپبالالى نەمەسە جاعدايى تومەن وتباسىلارعا قاۋىپسىزدىك ماقساتىندا ۋلى گازدى انىقتايتىن قۇرىلعى ورناتۋ باستالدى. بۇگىنگە دەيىن 23 داتچيك ورناتىلسا, ءالى ونىڭ 90-ىن ورناتۋ جوسپاردا بار, – دەيدى اتالعان دەپارتامەنتتىڭ الدىن الۋ ءبولىمىنىڭ اعا ينجەنەرى بەكبولات ورازحانۇلى.
«بايقوڭىرداعى» بالاباقشا جايى
وسىدان كەيىن بايقوڭىر اۋدانى اكىمدىگىنىڭ مۇشەلەرى ورنالاسقان ورىنعا قاراي جاقىنداپ, بالاباقشا جايىن قوزعادىق. بەلگىلى بولعانداي, بىلتىر عانا قۇرىلعان جاڭا اۋداندا باس-اياعى 18 مەملەكەتتىك بالاباقشا بولسا, ونىڭ 6-ۋى جوندەۋ جۇمىستارىن جۇرگىزۋدى تالاپ ەتەدى ەكەن. كۇزگە دەيىن ەكەۋى جاڭعىرتىلماق. الايدا مەملەكەتتىك بالاباقشا اشۋ بيىلعى جوسپاردا جوق كورىنەدى. ەسەسىنە بۇل ماسەلە اۋدانداعى 13 جەكەمەنشىك بالاباقشا ارقىلى رەتتەلىپ جاتىر ەكەن.
قورشاعان ورتانى قورعاۋ
ەلورداداعى كورىكتى جەرلەردىڭ ءبىرى – اقبۇلاق وزەنى جازدىگۇنى باقانىڭ كولشىگىندەي جاپ-جاسىل بولاتىن ساتتەرى ءجيى كەزدەسەدى. مۇنىڭ سىرىن بىلمەك ماقساتىندا قورشاعان ورتانى قورعاۋ جانە تابيعاتتى پايدالانۋ باسقارماسىنىڭ قىزمەتكەرلەرىنە جۇگىنگەن ەدىك, بۇل اقبۇلاقتىڭ كەي تۇستارى تايازدانىپ, استى بالدىر مەن توپىراققا تولىپ كەتكەننەن كۇن ىستىقتا بولادى ەكەن. بۇل ماسەلە قازىر پىسىقتالىپ, سمەتالىق قۇجاتتارى ازىرلەنىپتى. ءتيىستى قارجى بولىنسە, بيىلدان باستاپ تۇراقتى تازالاۋ جۇمىستارى قولعا الىنادى.
بۇدان بولەك, قالاداعى اعاش جايى دا قوزعالدى. ماسەلەن, قالانىڭ كوركىن ارتتىرىپ تۇرعان اعاشتى ەش سەبەپسىز كەسكەنى ءۇشىن 50 اەك كولەمىندە ايىپپۇل سالىنسا, قوسىمشا وتەۋى رەتىندە 5 اعاش وتىرعىزۋ مىندەتتەلەدى ەكەن. بۇل ءبىز قىزىقتىرعان سۇراقتاردىڭ جاۋابى بولدى.