2019 جىلى ەلوردادا 52 پروبلەمالىق نىسان بولدى. 2020 جىلدىڭ قورىتىندىسى بويىنشا 20 ءۇيدىڭ پروبلەماسى شەشىلدى. بۇل – 2700 ۇلەسكەر. 2021 جىلى 8 نىسان قۇرىلىسى اياقتالىپ, 7 مىڭداي ۇلەسكەر باسپانالارىنا يە بولدى. وسى جىلدىڭ سوڭىنا دەيىن 11 نىسانداعى قالعان 40 ءۇيدى اياقتاۋ جوسپارلانعان. بۇل – شامامەن 3 مىڭ ۇلەسكەر. قازىر قالعان پروبلەمالىق نىسانداردا قۇرىلىس-مونتاجداۋ جۇمىستارى جۇرگىزىلىپ جاتىر.
استانا قالاسى ءماسليحاتىنىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ ۇلەسكەرلىك قۇرىلىس ماسەلەلەرىنە ارنالعان وتىرىسىندا بۇل تۋرالى قالالىق ورتا ساپاسى جانە باقىلاۋ باسقارماسىنىڭ باسشىسى داۋلەت دوسقۇلوۆ ايتتى. ۇزاققا سوزىلعان قۇرىلىستاردى اياقتاۋ جۇمىسى جايىندا وكىلەتتى ورگان «ەلوردا قۇرىلىس كومپانياسى» جشس باس ديرەكتورى رۋسلان قادەسوۆ تولىعىراق باياندادى.
– 2021-2023 جىلدارى 10528 ۇلەسكەردى قۇرايتىن پروبلەمالى 33 نىسانداعى 170 ءۇيدىڭ قۇرىلىسىن اياقتاۋدى جوسپارلادىق. قازىر قۇرىلىستى اياقتاۋ مەرزىمى كەشىكتىرىلىپ جاتقانى تۋرالى كوپ ەسكەرتۋ ايتىلىپ جاتىر. سول ءۇشىن مىنانى ايتقىم كەلەدى: كەيبىر نىسانداردىڭ جوبالىق-سمەتالىق قۇجاتتاماسى بولمادى; كەي ءۇيدىڭ قاڭقاسى عانا تۇردى. ءبىز جۇمىستى قابىلداعاندا الدىنداعى قۇرىلىس سالۋشىنىڭ كەمشىلىكتەرى انىقتالدى. ولاردى جوندەۋگە تۋرا كەلەدى. وعان دا قانشاما ۋاقىت كەتەدى. قۇرىلىس ماتەريالدارىنىڭ قىمباتتاۋى دا نىسانداردى پايدالانۋعا بەرۋ مەرزىمىنە كەرى اسەرىن تيگىزدى. ءبىر ايتا كەتەرلىگى, جوبالىق-سمەتالىق قۇجاتتاماعا تۇزەتۋ ەنگىزۋ بارىسىندا قۇرىلىس جۇمىستارى توقتايدى. 2023 جىلى قالعان 11 نىساندى اياقتاۋ جوسپارلاندى. بۇل – 2026 ۇلەسكەر, – دەدى رۋسلان قادەسوۆ.
قالالىق ءماسليحات حاتشىسى ەرلان كاناليموۆ ۇلەستىك قۇرىلىس ماسەلەسى وتە ماڭىزدى ەكەنىن ايتا كەلە, بۇل تۋرالى Amanat پارتياسىنىڭ سايلاۋالدى باعدارلاماسىندا دا ايتىلعانىن, جەرگىلىكتى بيۋدجەتتەن وعان قوماقتى قارجى بولىنگەنىن اتاپ ءوتتى.
– ۇلەسكەرلەر ماسەلەسى 2023 جىلعا دەيىن شەشىلۋى ءتيىس ەدى. جىل اياقتالۋعا جاقىن. الايدا وبەكتيۆتى جانە سۋبەكتيۆتى سەبەپتەرگە بايلانىستى بيىل بىرقاتار پروبلەمالىق نىساندار اياقتالماي قالاتىن بولدى. 2019 جىلى 14500 ۇلەسكەر بولعان. ءۇش جىلدا 11 مىڭ ۇلەسكەردىڭ ماسەلەسى شەشىلدى. سوندا 3500 ۇلەسكەر قالدى, – دەگەن حاتشى قالعان 7 تۇرعىن ءۇي كەشەنى بويىنشا جۇرەتىن جۇمىستار كەستەسى بار ما دەپ سۇرادى. نەسيە جەلىلەرىن قايتارۋدىڭ قارجىلىق مودەلىنە كوزقاراسىن جەتكىزدى. پايدالانۋعا بەرىلگەن پروبلەمالى نىسانداردىڭ ينجەنەرلىك ينفراقۇرىلىمىنا دا مۇقيات بولۋ كەرەكتىگىن ايتتى. كەيبىر ۇلەسكەرلەر قالالىق ماسليحاتقا شاعىمدانعانىن ايتىپ, سونىڭ ىشىندە «بولاشاق باسپانا» تۇرعىن ءۇي-قۇرىلىس كووپەراتيۆى جۇمىسى تۋرالى سۇرادى. Vaikų stovyklos, Chemijos, biologijos, matematikos, lietuvių kalbos korepetitoriai, anglų kalbos pamokos https://intellectus.lt/
رۋسلان قادەسوۆتىڭ مالىمدەۋىنشە, وسى جىلدىڭ جەلتوقسان ايىندا 1500 ۇلەسكەر پاتەرلەرىنىڭ كىلتتەرىن الادى. ال كەلەسى جىلدىڭ ءبىرىنشى توقسانىنان قالعان 2 مىڭ ۇلەسكەرگە باسپانالارى بەرىلە باستايدى.
