جاسمينا تۇزەلوۆا – Binom Tanym مەكتەبىنىڭ 4-سىنىپ وقۋشىسى. 5 جاسىنان باستاپ ءان سالادى. تالانتتى ونەرپاز نەبارى 9 جاستا بولسا دا, بىرنەشە بايقاۋدىڭ جەڭىمپازى اتانىپ ۇلگەردى.
كاسىبي دەڭگەيدە ءان ايتۋدى 6 جاسىنان قولعا العان جاسمينا بوس ۋاقىتىندا ۆوكالمەن اينالىسقاندى, فورتەپيانودا ويناعاندى, بيسەرمەن توقىعاندى ۇناتادى. قازىرگى تاڭدا روزا باعلانوۆا اتىنداعى №2 بالالار مۋزىكا مەكتەبىندە 2-سىنىپتا وقيدى.
وتباسىندا بەس بالا بار. جاسمينا – ءۇيىنىڭ كەنجەسى. بىرنەشە جىل بۇرىن وتباسىمەن بىرگە تاشكەنت قالاسىنان ەلورداعا كوشىپ كەلگەن.
قاراپايىم وتباسىنان شىققان قىزدىڭ اكەسى – ون ساۋساعىنان ونەر تامعان ۇستا, اناسى گۇلزيا – مۋزىكانت, سكريپكادا ويناۋ ماماندىعى بويىنشا ءبىلىم العان. اناسىنىڭ ايتۋىنشا, ءجاسميننىڭ ونەرگە جاقىن بولۋى – اجەسىنەن دارىعان قاسيەت. «توي-تومالاقتا ءان شىرقاعاندى ۇناتاتىن اجەسىندەي جاسمينانىڭ دا سىڭعىرلاعان داۋىسى بار» دەيدى اناسى.
جاسمينا – «Central Asia’s Qot Talent» جوباسىنىڭ جارتىلاي ءفيناليسى, 2022 جىلعى «Qazaqstan داۋىسى. بالالار» بايقاۋىنىڭ قاتىسۋشىسى, سونداي-اق رەسەيدەگى بىرنەشە بايقاۋدىڭ قاتىسۋشىسى اتاندى.
– بۇل بايقاۋلاردا مەن ۇلكەن تاجىريبە جينادىم. كاسىبي مامانداردان ساباق الىپ, ولاردىڭ الدىندا ءان شىرقادىم. كوپتەگەن جاڭا دوس تاپتىم, – دەيدى جاس ءانشى.
جاقىندارىنىڭ ايتۋىنشا, ومىردە مىنەزى سابىرلى, ۇياڭ, جاناشىر قىز ساحناعا شىعىسىمەن اشىلا تۇسەدى. ال ءوزى ساحنانى ەرەكشە جاقسى كورەتىنىن ايتادى. «ساحنا – مەن ءۇشىن بولەك الەم. بارلىق ادامدى سىيدىرا الاتىن ۇلكەن جۇرەك سياقتى. مەنىڭ ويىمشا, كورەرمەندەردىڭ الدىندا تۇرىپ, ولاردىڭ قوشەمەتىنە بولەنۋ – ەرەكشە سەزىم» دەيدى جاسمينا.
اناسى گۇلزيا قىزىنىڭ ونەر جولىن جۇرەك قالاۋىمەن ءوزى تاڭداعانىن ايتادى.
– بالالارىمىزدىڭ بەتىن قاقپاي, وزدەرىنىڭ ۇناتاتىن ىسىمەن اينالىسقاندارىن قاشان دا قولدايمىز. قىزىم فورتەپيانوعا بارامىن دەپ ءاۋ باستا ءوزى ايتقان. نەگىزىنەن, ءۇيدىڭ كەنجەسى بولعان سوڭ, ەركە بولىپ ءوستى. دەگەنمەن ورىنسىز ەركەلىگى جوق. اعالارىنا, اپكەلەرىنە قولعانات بولىپ جۇرەدى. ءوزى جان-جاقتى. قاي ءىستى قولعا السا دا وڭايلىقپەن الىپ شىعادى. ساباقتى دا ۇزدىك وقيدى. 2-سىنىپقا دەيىن تازا بەسكە وقىدى. تەك كەيىن بايقاۋلارعا كوپ قاتىسقاننان سوڭ, تورتتىك باعالار الىپ ءجۇر. ءبىر بايقاۋدان ەكىنشىسىنە قاتىسۋ, ونىڭ ۇستىنە قوسىمشا ۇيىرمەلەرمەن اينالىسۋ ساباعىنا اسەر ەتتى دەپ ويلايمىن. ەندىگى كەزەكتە ساباعىمىزدى قولعا الامىز دەپ وتىرمىز, – دەيدى اناسى.
جاس تالانت جاسمينانىڭ سۇيىكتى پاندەرى – دەنە شىنىقتىرۋ مەن اعىلشىن ءتىلى. وزىنە دەنەسىن شىنىقتىرىپ, سپورتپەن اينالىسقان ۇنايدى. اكەسى دە سپورتقا جاقىن.
سونداي-اق جاسمينا تۇزەلوۆا – «بالا داۋىسى» ۇلتتىق بالالار ءان بايقاۋىنىڭ التىنشى ماۋسىمىنىڭ گران-پري يەگەرى. وسى بايقاۋدا وعان قازاق ۇلتتىق ونەر ۋنيۆەرسيتەتىندە وقۋعا گرانت بەرىلدى.
اناسى «بالا داۋىسى» بايقاۋى بەرەرى مول جوبا ەكەنىن اتاپ ءوتتى. «بىلتىرعى جىل ءبىز ءۇشىن جەمىستى بولدى. «بالا داۋىسى» جوباسىندا قىزىم ەڭ كىشكەنتاي قاتىسۋشى بولدى. بىلىكتى مامانداردان بي بيلەپ, ءان ايتۋدان ساباق الدى. سول بايقاۋ كەزىندە جاسمينانىڭ ءبىر اپتاداي تاماعى اۋىرىپ قالدى. دارىگەرلەر ءان ايتپاق تۇگىل, سويلەۋگە دە بولمايدى دەدى. بايقاۋعا ءبىر كۇن قالعاندا وركەسترمەن ساحنادا ءبىر رەت دايىندىق جاسادى. بىراق داۋىسىن شىعارماي ىشتەي عانا بيلەپ, الدىن الا ويلاستىرىپ دايىندالدى. ەرتەسىنە وسى دايىندىقپەن ساحناعا شىعىپ كەتتى. اللاعا شۇكىر, بايقاۋدا جەڭىسكە جەتتى. بۇل دا بەرىلگەن ءبىر سىناق شىعار» دەدى.
جاس ورەننىڭ كەز كەلگەن جەتىستىگى – بۇكىل اۋلەت ءۇشىن ۇلكەن قۋانىش. جاسمينانىڭ ارمانى – تەك العا ۇمتىلىپ, اعا-اپكەلەرىنىڭ جولىن قۋ.
– بىردە اناشىم ەكەۋمىز ديماش قۇدايبەرگەننىڭ كونتسەرتىنە بارعانبىز. سول كەزدە ماعان ونىڭ داۋىسى قاتتى ۇنادى. ەندى سول كىسىنىڭ الدىنا بارىپ, بىرگە ءان شىرقاۋدى ارماندايمىن, – دەيدى ول.
ارمانىن ماقساتىنا اينالدىرعان كىشكەنتاي قىز 2023 جىلى ديماش قۇدايبەرگەننىڭ جەتەكشىلىگىمەن وتكىزىلىپ كەلە جاتقان «باقىتتى بالا» جوباسىنا قاتىسپاق.
