جەمقورلىقتى اتام زاماننان كەلە جاتقان, جەر شارىنداعى مەملەكەتتەردىڭ بارىنە ءتان ىندەت دەپ ەسەپتەۋگە بولادى. وكىنىشتىسى, بۇل مەملەكەتتىڭ, قوعامنىڭ دامۋىنا تەجەۋ بولاتىن, بولاشاعىنا كەسىرىن تيگىزەتىن ىندەت. ونىڭ تامىرىنا تۇبەگەيلى بالتا شاپپايىنشا, مەملەكەتتە تۇراقتى ءوسۋ-وركەندەۋ بولمايدى.
سوندىقتان ەلباسىمىز جۋىردا جاساعان جولداۋىندا سالىق ساياساتى تۋرالى ايتا كەلە: «ءبىز نارىق قاتىسۋشىلارىن سالىقتان جالتارۋ جولدارىن ىزدەۋگە ەمەس, باسەكەلەستىككە ىنتالاندىرۋىمىز قاجەت» دەدى.
جەمقورلىقتىڭ ءبىر ءتۇرى وسى سالىقتان جالتارۋ, سىبايلاستىق, تانىس-ءبىلىس ارقىلى قانشا تابىس تاۋىپ وتىرعانىنا قاراماستان, مەملەكەتكە ءتيىستى ۇلەسىن قوسۋدان باسىن الىپ قاشۋ. بۇل – ءوز كەزەگىندە ەل دامۋىنا تەجەۋ بولادى. سوندىقتان, 1998 جىلدىڭ 2 شىلدەسىندە قازاقستان رەسپۋبليكاسىنىڭ «سىبايلاس جەمقورلىققا قارسى كۇرەس تۋرالى» زاڭى قابىلدانىپ, وندا سىبايلاس جەمقورلىقپەن كۇرەسۋ ءاربىر مەملەكەتتىك ورگاندار باسشىلارىنىڭ, مەملەكەتتىك قىزمەتكەردىڭ, ەل ازاماتتارىنىڭ مىندەتى ەكەندىگى اتاپ كورسەتىلدى.
قازاقستان رەسپۋبليكاسى ۇكىمەتى قاۋلىسىمەن «2011-2015 جىلدارعا ارنالعان سىبايلاس جەمقورلىقپەن كۇرەس باعدارلاماسى» بەكىتىلدى. وسى باعىتتا قازاقستان رەسپۋبليكاسى قورشاعان ورتانى قورعاۋ مينيسترلىگى دە ءوز جوسپارىن بەكىتىپ جۇمىس جاساۋدا. بۇل باعدارلامانىڭ باستى ماقساتى – ىندەتكە بەلسەنە قارسى تۇرۋ ارقىلى ۇلتتىق قاۋىپسىزدىكتى قامتاماسىز ەتۋگە باعىتتالعان شارالار جۇيەسىن ودان ءارى جەتىلدىرۋ. اتالمىش باعدارلاما ازاماتتاردىڭ قۇقىقتارى مەن بوستاندىقتارىن قورعاۋعا, سىبايلاس جەمقورلىق كورىنىستەرىنەن تۋىندايتىن قاۋىپ-قاتەردەن ەلىمىزدى ساقتاۋعا, ۇلتتىق قاۋىپسىزدىكتى قامتاماسىز ەتۋگە, جەمقورلىققا قاتىستى قۇقىق بۇزۋشىلىقتىڭ الدىن الۋعا باعىتتالعان.
ەلباسى «قازاقستان – 2050» ستراتەگياسى ارقىلى ۇلكەن ماقسات-مىندەتتەر جۇكتەپ وتىر. سونىڭ ءبىرى – الداعى جىلدارى ەلىمىزدى الەمنىڭ ەڭ دامىعان 50 ەلىنىڭ قاتارىنا ەنگىزۋ. بۇل ورايدا, ءوزىن پاتريوتپىن ەسەپتەيتىن ءار ازامات جەمقورلىق پەن ارسىزدىقتان ادا, ەل مۇددەسىن ءوز مۇراتىنان ءبولىپ قاراماۋى ءتيىس.
وسپان مۇحتارحانوۆ,
زاڭگەر