قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي «نۇر وتان» پارتياسىنىڭ استانا قالالىق فيليالى ەلورداداعى باستاۋىش پارتيا ۇيىمدارىنىڭ جۇمىستارىن قورىتىندىلاپ, ولاردىڭ اراسىنان ۇزدىك اتانعانداردى ماراپاتتادى.
ۇيىمداستىرۋشىلاردىڭ ايتۋىنشا, ادەمى داستۇرگە اينالعان بايقاۋدىڭ ماقساتى – شاھارداعى باستاۋىش پارتيا ۇيىمدارىنىڭ اراسىنان سۋىرىلىپ شىققانداردى انىقتاپ, ولاردىڭ جۇمىسىن رەسپۋبليكانىڭ باسقا وڭىرلەرىنە دارىپتەپ, تاجىريبەلەرىمەن ءبولىسۋ.
الدىمەن ساحناعا كوتەرىلگەن «نۇر وتان» پارتياسىنىڭ حاتشىسى قانىبەك جۇماشەۆ جينالعانداردى تۇڭعىش پرەزيدەنت كۇنى مەرەكەسىمەن قۇتتىقتاپ, ءبىر توپ ازاماتتارعا پارتيانىڭ جاڭا مۇشەلىك بيلەتتەرىن تاپسىردى. ولاردىڭ قاتارىندا قازاقستان رەسپۋبليكاسىنىڭ ەڭبەك سىڭىرگەن ءارتىسى جاننات باقتاي, كاسىپكەر دانيار تۇڭعىشباەۆ جانە تاعى باسقا ازاماتتار بولدى.
بايقاۋ ءۇش ءتۇرلى سانات بويىنشا وتكىزىلدى. 1-ساناتتاعى باستاۋىش ۇيىمدارعا پارتيا مۇشەلەرىنىڭ سانى 100-گە دەيىن ۇيىمدار جاتادى. وسى اتالىمداعى ءبىرىنشى ورىندى ەلورداداعى قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمەسىنىڭ «شاراپات» باستاۋىش پارتيا ۇيىمى جەڭىپ الدى. پارتيا مۇشەلەرىنىڭ سانى 100-دەن 500-گە دەيىن ۇيىمدار اراسىندا «قازاقتەلەكوم» اق وزات دەپ تانىلدى. ال مۇشەلەرىنىڭ سانى 500-دەن جوعارى ۇيىمدار ىشىندە قر مادەنيەت جانە سپورت مينيسترلىگى العا شىقتى. جەڭىمپازداردىڭ ءبارى باعالى سىيلىقتارمەن ماراپاتتالدى.
شارا بارىسىندا ەلگە تانىمال انشىلەر ءوز ونەرلەرىن كورسەتىپ, قاتىسۋشىلاردى كوركەم كۇيگە بولەدى.
ازامات ەسەنجول
