جانى جايساڭ جان ەدى…
2016 جىلعى 3 شىلدەدە كورنەكتى مەملەكەت قايراتكەرى, حالقىمىزدىڭ اياۋلى قىزدارىنىڭ ءبىرى قايىربەكوۆا ساليدات زەكەنقىزى مەزگىلسىز دۇنيەدەن ءوتتى.
1961 جىلى 1 تامىزدا قاراعاندى وبلىسىندا دۇنيەگە كەلگەن. ول 1984 جىلى قاراعاندى مەملەكەتتىك مەديتسينا ينستيتۋتىن «ەمدەۋ ءىسى» ماماندىعى بويىنشا, 2002 جىلى ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن.
1984-1998 جىلدارى قاراعاندى وبلىسىنىڭ مەديتسينا ۇيىمدارىندا دارىگەر-نەۆروپاتولوگ, قاراعاندى كوپ باعدارلى ەمدەۋ-دياگنوستيكالىق بىرلەستىگىندە باس دارىگەردىڭ ورىنباسارى بولىپ ەڭبەك ەتكەن.
1998-2001 جىلدارى قاراعاندى وبلىس دەنساۋلىق ساقتاۋ باسقارماسىنىڭ مەديتسينالىق كومەكتى ۇيىمداستىرۋ ءبولىمىنىڭ باستىعى, قاراعاندى وبلىستىق ەڭبەك, جۇمىسپەن قامتۋ جانە حالىقتى الەۋمەتتىك قورعاۋ باسقارماسىنىڭ №5 مەديتسينالىق-الەۋمەتتىك ساراپتاما كوميسسياسىنىڭ ءتورايىمى, 2001-2004 جىلدارى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ءبولىم باستىعى, باسقارما باستىعى, ەمدەۋ-پروفيلاكتيكالىق جۇمىس دەپارتامەنتى ديرەكتورىنىڭ ورىنباسارى, اپپارات باسشىسى قىزمەتىن اتقاردى.
2004-2006 جىلدارى قازاق مەملەكەتتىك مەديتسينا اكادەمياسىنىڭ پرورەكتورى, 2006-2008 جىلدارى قازاقستان رەسپۋبليكاسىنىڭ پرەزيدەنتى اكىمشىلىگىندە ءارتۇرلى قىزمەتتە, 2008 جىلعى 4 جەلتوقساننان باستاپ قازاقستان رەسپۋبليكاسى دەنساۋلىق ساقتاۋ مينيسترلىگى مەديتسينالىق قىزمەت كورسەتۋ سالاسىنداعى باقىلاۋ كوميتەتىنىڭ ءتورايىمى, 2009 جىلعى 5 قازاننان باستاپ قازاقستان رەسپۋبليكاسى دەنساۋلىق ساقتاۋ مينيسترلىگى مەديتسينالىق قىزمەتكە اقى تولەۋ كوميتەتىنىڭ ءتورايىمى, 2010 جىلى ۆيتسە-مينيستر بولىپ ەڭبەك ەتتى.
ساليدات زەكەنقىزى قازاقستان رەسپۋبليكاسى پرەزيدەنتىنىڭ جارلىعىمەن 2010 جىلعى 7 قازاندا قازاقستان رەسپۋبليكاسىنىڭ دەنساۋلىق ساقتاۋ ءمينيسترى بولىپ تاعايىندالدى. ونىڭ وتاندىق مەديتسينا سالاسىن وركەندەتۋگە قوسقان ۇلەسى ولشەۋسىز. ارامىزدا بولسا, ءالى تالاي يگى ىستەردىڭ باسىنان تابىلا بەرەتىن ەدى. امال قانشا…
قازاقتا «ءومىر بار جەردە ءولىم بار» دەيدى. تاعدىردىڭ جازۋى وسى بولار.
استانا قالاسىنىڭ اكىمدىگى مارقۇمنىڭ تۋعان-تۋىستارى مەن جاقىن-جورالارىنا قايعىرىپ, كوڭىل ايتادى. ساليدات زەكەنقىزىنىڭ جاتقان جەرى جايلى, توپىراعى تورقا بولسىن.