وتباسى كۇنىنە وراي مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتى مەن قالالىق كاسىپوداق ورتالىعىنىڭ ۇيىمداستىرۋىمەن مەملەكەتتىك قىزمەتكەرلەر اراسىندا «مەملەكەتتىڭ تىرەگى – وتباسى» اتتى سپارتاكيادا ءوتتى.
شارانىڭ سالتاناتتى اشىلۋىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنت باسشىسى جازيرا جىلقىشيەۆا قاتىسۋشىلارعا ساتتىلىك تىلەدى.
سالاۋاتتى ءومىر سالتىن ناسيحاتتاۋ ماقساتىندا وتكىزىلگەن ەستافەتالىق جارىستا 10 وتباسىلىق كوماندا قاپپەن جۇگىرۋ, سەكىرۋ, قاقپاعا دوپ لاقتىرۋ, ارقان تارتۋ سياقتى سپورتتىڭ 6 تۇرىنەن سىنعا ءتۇستى. ءماسليحات دەپۋتاتتارى مەن قالالىق كاسىپوداق ورتالىعىنىڭ توراعاسى تاستانبەك ەسەنتاەۆ قاتىسۋشىلارعا قازىلىق ەتتى.
جارىس قورىتىندىسى بويىنشا استانا قالاسى توتەنشە جاعدايلار دەپارتامەنتىنىڭ اتىنان قاتىسقان پالەۆيچتەر وتباسى جەڭىسكە جەتسە, ءىى ورىندى قوعامدىق دەنساۋلىق ساقتاۋ دەپارتامەنتى ەسىل اۋدانى قوعامدىق دەنساۋلىق ساقتاۋ باسقارماسىنىڭ اتىنان قاتىسقان بايمۇحامبەتوۆتەر وتباسى ەنشىلەدى. ال ءىىى ورىن استانا قالاسى ادىلەت دەپارتامەنتىنىڭ اتىنان قاتىسقان يمانباەۆتار وتباسىنا بۇيىردى. جەڭىمپازدار كۋبوكپەن, مەدالدارمەن, ديپلومدارمەن جانە ەستەلىك سىيلىقتارمەن ماراپاتتالدى.
