جاس جاۋىنگەرلەر ورالدى
ەلوردانىڭ قورعانىس ىستەرى جونىندەگى دەپارتامەنتى اسكەردەن ورالعان جاس جاۋىنگەرلەردى سالتاناتتى تۇردە قارسى الۋ ءىس-شاراسىن ۇيىمداستىردى.
پويىزدىڭ الماتىدان استاناعا كەلۋىنىڭ ءوزى دە ەرەكشە بولدى. پەرروندا قارۋلى كۇشتەر مەن اۋعان سوعىسى ارداگەرلەرى, «جاس سارباز» رەسپۋبليكالىق اسكەري-پاتريوتتىق قوزعالىسىنىڭ تاربيەلەنۋشىلەرى, ساربازداردىڭ اتا-انالارى, تۋىستارى مەن دوستارى جينالدى.
زاپاسقا شىققان اسكەري قىزمەتشىلەردى اسكەري وركەستردىڭ اۋەنىمەن سۇيەمەلدەپ قارسى العان تەمىرجول بويى ناعىز مەرەكەلىك الاڭعا اينالدى. ءتۇر-تۇلعاسىن ەرەكشەلەپ تۇراتىن كوگىلدىر بەرەت كيگەن دەسانتشىلارعا بالالار قىزىعا قارادى.
– قارۋلى كۇشتەردىڭ بولىمشەلەرىندە شىمىر جانە جان-جاقتى جاقسى دايىندالعان جاستاردى جينايمىز. بۇل – ولاردىڭ كەلەشەگىنە جاقسى جولداما. ارميا مەكتەبىنەن وتكەن ادامنىڭ جۇمىسقا ورنالاسۋدا دا وزىندىك ارتىقشىلىعى بارىنا نىق سەنىمدىمىن, – دەدى استانا قالاسى قورعانىس ىستەرى جونىندەگى دەپارتامەنتى باستىعىنىڭ ورىنباسارى, مايور ارتۋر قاسقاراۋوۆ. ول سونداي-اق ساربازدارعا ساتتىلىك تىلەپ, پاتريوت بالالاردى تاربيەلەگەن اتا-انالارىنا العىسىن ءبىلدىردى.