ە.راحماديەۆ اتىنداعى مەملەكەتتىك اكادەميالىق فيلارمونياسىندا وسى ونەر ۇجىمىنىڭ «حالىق ءانى» ءبولىمىنىڭ كوركەمدىك جەتەكشىسى, ءانشى, ۇستاز, مادەنيەت سالاسىنىڭ ۇزدىگى, ونەرتانۋ ماگيسترى تەلمان نۇركەنوۆتىڭ «ءان قاناتىندا» اتتى جەكە كونتسەرتى ءوتتى.
كەش يەسى سەمەيدەگى م.تولەباەۆ اتىنداعى مۋزىكا ۋچيليششەسىنەن كەيىن استاناداعى قازاق ۇلتتىق مۋزىكا اكادەمياسىندا ەربول ساريننەن ءدارىس الدى. وسى وقۋ ورنى قازاق ۇلتتىق ونەر ۋنيۆەرسيتەتىنە اينالعاندا, ماگيستراتۋراعا ءتۇسىپ, قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى قايرات بايبوسىنوۆتىڭ جەتەكشىلىگىمەن جۇمىسىن قورعادى. قايرات اۋكەنۇلى شاكىرتىن اقمولادان شىققان ءدۇلدۇل ءانشى, قازاقتىڭ تالاي ءانىن جاڭعىرتىپ, جەتكىزۋشى قوسىمجان باباقوۆتىڭ شىعارماشىلىعىنا باعىتتادى. قازىر تەلمان نۇركەنوۆ «ءانشى قوسىمجان» اتتى مونوگرافيالىق ەڭبەك جازىپ جاتىر. سونداي-اق قاراوتكەل زامانىندا ءومىر سۇرگەن ءيمانجۇسىپ, عازيز, ساتماعامبەت, قاپاش سىندى ءانشى-اقىنداردىڭ ءومىرى مەن شىعارماشىلىعىن زەرتتەيدى, قازاق انشىلەرىندە سيرەك قولدانىلاتىن تەرىس بۇراۋدا ءان ايتۋ مانەرىن ناسيحاتتايدى. ءوزى بىتىرگەن وقۋ ورنىنىڭ «ءداستۇرلى ءان» كافەدراسىندا ساباق بەرەدى.
ءانشى «دالا ءداستۇرى», «ۇلى دالا داۋىسى», «ءان بازارى – قاراوتكەل» كونتسەرتتىك جوبالارىنىڭ اۆتورى. بۇعان دەيىنگى 2018 جىلى وتكەن جەكە كونتسەرتىندە اقان سەرى, ءبىرجان سال, نارتاي بەكەجانوۆ, ەستاي بەركىمبايۇلى سىندى ءداستۇرلى ءان دۇلدۇلدەرىنىڭ شىعارمالارىن ورىنداسا, بۇل جولعى ءان كەشىندە ۇكىلى ىبىراي, ءيمانجۇسىپ قۇتپانۇلى, سادىقوجا موشانۇلى, يسا بايزاقوۆ, ۇلى اباي اندەرىن, سونىمەن قاتار يليا جاقانوۆ, تەمىرجان بازارباەۆ, اسەت بەيسەۋوۆ, تۇرسىنجان شاپاي سىندى كومپوزيتورلاردىڭ اندەرىن ۇسىندى.
استانالىق فيلارمونيانىڭ قازاق وركەسترىنىڭ ورىنداۋىندا تۇركەشتىڭ «كوڭىلاشار» كۇيىمەن اشىلعان كەش ەكى بولىمگە ءبولىندى. وركەسترگە مادەنيەت قايراتكەرى نۇرلان بەكەنوۆ ديريجەرلىك ەتتى. العاشقى بولىمدە تەلمان نۇركەنوۆ وسى وركەستردىڭ سۇيەمەلدەۋىمەن جانە جەكە داۋىستا ءان شىرقاسا, ەكىنشى بولىمدە «قورقىت» ەتنوانسامبلىمەن بىرگە اندەردى اۋەلەتتى.
«شالقىما» حالىق بي ءانسامبلى كەشتىڭ شىرايىن كىرگىزدى. ەلىمىزگە بەلگىلى انشىلەر, قازاقستاننىڭ ەڭبەك سىڭىرگەن قايراتكەرلەرى ايگۇل قوسانوۆا, گۇلميرا سارينا جانە گۇلزيرا بوكەيحان كەش يەسىن قولداپ, كورەرمەندەردىڭ قۇلاق قۇرىشىن قاندىردى. تەلمان نۇركەنوۆ دۋەت بولىپ تا ولارمەن ءان سالدى. الماتىدان ات ارىتىپ جەتكەن مايتالمان ءانشى ەركىن شۇكىمان ونەردەگى ىنىسىنە شىعارماشىلىق تابىس تىلەپ, ەكى ءان شىرقادى.
