اسحات ورالوۆ,
قر قوعامدىق دامۋ مينيسترلىگى
جاستار ساياساتى دەپارتامەنتىنىڭ ديرەكتورى:
– ەلباسى بيىلعى جولداۋىندا جاستار مەن وتباسى ينستيتۋتىن كەشەندى قولداۋ مەملەكەتتىك ساياساتتىڭ نەگىزگى باعىتىنا اينالۋى تيىستىگىن باسا ايتىپ, كەلەسى جىلدى «جاستار جىلى» دەپ جاريالاۋى ەل اراسىندا بىردەن قولداۋ تاپتى. بۇگىندە رەسپۋبليكامىزدىڭ 17 ايماعىندا دا وسى ۇسىنىسقا قاتىستى دايىندىق قىزۋ جۇرگىزىلىپ جاتىر. ايتالىق, مينيسترلىكتەر, ورتالىق مەملەكەتتىك ورگاندار, جەرگىلىكتى اتقارۋشى مەكەمەلەر جانە ۇكىمەتتىك ەمەس ۇيىمدار ءوزارا بىرلەسىپ, جاستارعا ارنالعان «جول كارتاسىنىڭ» جوسپارىن ازىرلەۋدە. وندا ساپالى ءبىلىمنىڭ قولجەتىمدى بولۋى, وتباسى قۇندىلىقتارى, سالاۋاتتى ءومىر سالتىن ناسيحاتتاۋ, مۇمكىندىگى شەكتەۋلى جاستاردى قولداۋ سەكىلدى وزەكتى تاقىرىپتار اياسىنداعى 100 جوبا قامتىلادى.
بۇدان بولەك, قوعامدىق دامۋ مينيسترلىگى جاستارمەن جۇمىستىڭ ءتورت نەگىزگى باعىتىنا باسىمدىق بەرۋگە تىرىسادى. بىرىنشىدەن, جەتكىنشەكتەردىڭ وتاندىق تۋريزمگە دەگەن قىزىعۋشىلىعىن ارتتىرۋ كوزدەلىپ وتىر. سول ماقساتتا جوعارى سىنىپ وقۋشىلارىنا ارنالعان تۋريستىك باعدارلامالار ىسكە اسىرىلادى. ەكىنشىدەن, بارلىق وقۋ ورىندارىندا كاسىپتىك باعدارلاۋ جۇمىستارىن جۇرگىزۋدى قاداعالاماقپىز. ياعني وقۋشىلاردىڭ جاستايىنان بەلگىلى ءبىر كاسىپكە دەگەن ىنتاسىن وياتۋدى مۇرات تۇتتىق. ۇشىنشىدەن, جاستار كاسىپكەرلىگىن دامىتۋعا كوڭىل بولىنەدى. تورتىنشىدەن, جاستاردىڭ الەۋمەتتانۋىنا جاعداي جاساۋ نازارعا الىنباق. بۇل تۇرعىدا جاستاردىڭ ۆولونتەرلىك, شىعارماشىلىق جانە ەڭبەك قابىلەتتەرىن شىڭداۋعا مۇمكىندىكتەر بەرىلەدى.
