جازعى مەكتەپ – تاماشا مۇمكىندىك

بالالاردىڭ كوپتەن اڭساپ كۇتەتىن مەزگىلى – جاز. سەبەبى جازدا شىعارماشىلىقپەن, سپورتپەن, سونداي-اق ءوزى ۇناتقان ىسپەن اينالىسا الادى. وسى رەتتە نۇر-سۇلتان قالاسىنداعى بالالار باراتىن مادەني-رۋحاني ورىندارمەن تانىسىپ شىقتىق.

ەلىمىزدە 26 مامىردان باستاپ جازعى مەكتەپتەر اشىلدى. مۇندا ماتەماتيكا, فيزيكا, اعىلشىن ءتىلى جانە وزگە ماڭىزدى ءپان بويىنشا ساباق وتەدى. سونىمەن قاتار بالالار مۇراجاي مەن ەكسكۋرسياعا بارا الادى. جازعى مەكتەپتە وقۋشىلارعا باعا قو­يىلمايدى جانە ءۇي تاپسىرماسى بەرىلمەيدى.

– جازعى مەكتەپ – بالالار ءۇشىن جاقسى مۇمكىندىك. وسى ارالىقتا ولار وقۋداعى ۇلگەرىمىن دۇرىستاي الادى. مۇندا تەك وقۋ ۇلگەرىمى تومەن بالالار عانا ەمەس, ۇزدىك وقۋشىلار دا قاتىسا الادى. بارلىق وقۋشىلارمەن تىعىز جۇمىس ىستەيمىز, – دەدى №51 مەكتەپ مۇعالىمى ساۋلە قورقىتباي.

وقۋ جىلى ەندى عانا اياقتالسا دا, بالالار ءوزى قىزىعاتىن ۇيىرمەگە بارىپ ءجۇر. سونىڭ ىشىندە ءال-فارابي اتىنداعى وقۋشىلار سارايىن اتاپ ايتساق بولادى. وندا 125 ۇيىرمە جۇمىس ىستەيدى. ۇيىرمەلەرگە مەكەمەنىڭ سايتى ارقىلى تىركەلۋگە بولادى. سونداي-اق وقۋشىلار سارايىنا كەلىپ, جولىعۋ ارقىلى دا جازىلۋعا مۇمكىندىك بار.

بالالار جازعى دەمالىسىن ءارتۇرلى وتكىزەدى. مىسالى, ەلورداداعى №51 مەكتەپتىڭ 5-سىنىپ وقۋشىسى جانبولات وراز – ءۇيىر­مەگە قاتىسۋ ءۇشىن دەمالىستى اسىعا كۇتكەندەردىڭ ءبىرى.

– جىل بويى ۇلگەرىمىم جاقسى بولۋى ءۇشىن ءوزىم قىزىعاتىن ۇيىرمەلەرگە قاتىسا المادىم. جالپى كوپ نارسەگە قىزىعامىن. اتاپ ايتقاندا, فۋتبول ويناۋ, سۋدا ءجۇزۋ, اتقا ءمىنۋ, بوكس قاتتى ۇنايدى. دەمالىسقا شىققالى بەرى ءجۇزۋ سەكتسياسىنا جازىلدىم. ءبىر اپتادا ءتاپ-ءتاۋىر ۇيرەنىپ الدىم. جازعى دەمالىسىم ويداعىداي ءوتىپ جاتىر, – دەدى ول.

ەلوردادا بالالار ءۇشىن باراتىن رۋحاني ورىنداردىڭ ءبىرى – مۇراجاي. نۇر-سۇلتان قالاسىندا ولاردىڭ سانى كوپ. ەڭ اۋقىمدىسى – قازاقستان رەسپۋبليكاسىنىڭ ۇلتتىق مۋزەيى.

– مۋزەيگە كىرۋ وقۋشىلار ءۇشىن تەگىن. ال ەرەسەكتەرگە – 1400 تەڭگە, ستۋدەنتتەرگە – 700 تەڭگە. تەك وزىمەن بىرگە تولقۇجاتى بولۋى قاجەت. مۋزەيدە جازعى ۋاقىتتا بالالارعا ارنالعان شارالار مەن كەزدەسۋلەر دە ءوتىپ تۇرادى, – دەدى قر ۇلتتىق مۋزەيىنىڭ قىزمەتكەرى نۇردانا اۋەلبەك.

قالادا بالالاردىڭ ۋاقىتىن ءتيىمدى ءارى اقىسىز وتكىزۋ ءۇشىن بىرنەشە مادەني ورىن كوپ ەكەنىن بايقادىق. گادجەتكە تەلمىرمەي وسكەن بالانىڭ رۋحاني بولمىسى دا وزگەرەدى. سوندىقتان جازعى دەمالىستى ەستە قالارداي وتكىزۋ ءۇشىن ءبىز ايتقان مادەني ورىنداردىڭ ماڭىزى زور دەپ ويلايمىن.

مەرەي اقىلبەك, ل.گۋميلەۆ اتىنداعى ەۇۋ ستۋدەنتى