ە.راحماديەۆ اتىنداعى مەملەكەتتىك اكادەميالىق فيلارمونيانىڭ «قورقىت» ەتنو ءانسامبلى «جەتىسۋ اۋەندەرى» اتتى كونتسەرت ۇسىندى.
كونتسەرت شىمىلدىعى م.بەردىعۇلوۆتىڭ «شاشۋ» شىعارماسىمەن اشىلدى. ال كونتسەرتتىڭ نەگىزى بولعان م.اۋباكىروۆتىڭ «جەتىسۋ سۋرەتتەرىن» ورىنداعان شىعارماشىلىق توپ تىڭدارماننىڭ كوز الدىنا جەتىسۋ ءوڭىرىنىڭ بار كوركەمدىگىن اكەلگەندەي بولدى. كەشتە «قورقىت» ەتنو ءانسامبلى جانە فيلارمونيانىڭ ءداستۇرلى انشىلەرى قازاقستاننىڭ ەڭبەك سىڭىرگەن قايراتكەرى ارايلىم راحىم, مادەنيەت سالاسىنىڭ ۇزدىكتەرى تەلمان نۇركەنوۆ, نۇراي تاناباەۆ, ايگەرىم نارتۇيە, دانيار مۇقان جانە حالىقارالىق بايقاۋلاردىڭ لاۋرەاتتارى ايدوس وڭعارباي, الۋا قالىمبەكوۆا, نۇرجان مەيىرحان ونەر كورسەتتى.
«كونتسەرتتىڭ نەگىزگى ماقساتى – جەتىسۋ كومپوزيتورلارىنىڭ اندەرىن, كۇيلەرىن ناسيحاتتاۋ. سونىمەن قاتار, ەتنوانسامبلىنىڭ ورىنداۋشىلىق شەبەرلىگىن كوپكە تانىتۋ. جالپى, ءبىزدىڭ ونەر ۇجىمى قاتىسقان بايقاۋلاردا, كونتسەرتتەردە ونەرسۇيەر كوپشىلىك ىلعي ءوز ريزاشىلىقتارىن ءبىلدىرىپ جاتادى. بۇگىنگى كونتسەرت تە وتە ءساتتى ءوتتى دەپ ويلايمىن. تىڭدارماندار «بەينە ءبىر سپەكتاكل تاماشالاعانداي بولىپ شىقتىق» دەپ اسەرلەرىمەن بولىسۋدە. وسىلايشا ۇلتتىق ونەرىمىزدىڭ وركەندەۋىنە ۇلەس قوسىپ جاتقانىمىزعا ءدان ريزامىز» دەدى «قورقىت» ەتنو ءانسامبلىنىڭ كوركەمدىك جەتەكشىسى, قازاقستاننىڭ مادەنيەت قايراتكەرى شولپان قورعانبەك.
