ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ كامەرالىق حورى «تال بەسىكتەن – جەر بەسىككە…» اتتى تەاترلاندىرىلعان قويىلىم ۇسىندى. «استانا وپەرا» تەاترىنىڭ كۇلاش بايسەيىتوۆا اتىنداعى كامەرالىق زالىندا وتكەن كەش قازاقتىڭ ءداستۇرلى ادەت-عۇرىپتارىنا نەگىزدەلگەن.
ۇلتىمىزدىڭ كۇندەلىكتى تۇرمىس-تىرشىلىگى سان ءتۇرلى سالت-داستۇرلەرگە, وتباسىلىق, تۇرمىستىق ادەت-عۇرىپتارعا تولى. ولاردىڭ بارلىعى رۋحاني ومىرىمىزدە كورىنىس تاۋىپ, ەتنيكالىق مادەنيەتىمىزدى قۇرايدى. قويىلىم حالىق مۋزىكاسى مەن ۇلتتىق كلاسسيكا داستۇرلەرىنە نەگىزدەلگەن. قويىلىمدا قازاق حالقىنىڭ دانالىعىن, كەڭپەيىلدىلىگىن, قوناقجايلىعىن, فيلوسوفياسى مەن دۇنيەتانىمىن اشاتىن سالت-داستۇرلەر مەن ادەت-عۇرىپتاردىڭ وزىندىك كەشەنى دراماتۋرگيالىق تۇرعىدا قۇرىلعان.
حور ارتىستەرى ۇلتتىق كيىمدە, ۇلتتىق ناقىشتاعى ساحنادا ولەڭدەردى كوركەمدەپ وقىپ, داۋلەتكەرەيدىڭ «قاماجاي», «قوسالقا» (وڭدەگەن ە.كوروبەينيكوۆا), «قۋىرماش» (وڭدەگەن ءا.ءابدىنۇروۆ) كۇيلەرىن, ە.حاسانعاليەۆتىڭ «كەلشى, كەلشى بالاشىم» ءانىن, قۇرمانعازىنىڭ «بالبىراۋىن» (وڭدەگەن ە.ابىلاي) كۇيىن جانە حورعا ارنالىپ وڭدەلگەن قازاقتىڭ حالىق اندەرى مەن قازاق كومپوزيتورلارىنىڭ شىعارمالارىن ورىندادى. كونتسەرتكە كامەرالىق حوردىڭ جەكە ورىنداۋشىلارى جۇبانىش زەتوۆا, ابىلاي ەربولات, جاندوس بايبوسىنوۆ, ءادىل سۇلتان قاتىستى.
«تال بەسىكتەن – جەر بەسىككە…» تەاترلاندىرىلعان قويىلىمى العاش رەت ەل تاۋەلسىزدىگىنىڭ 30 جىلدىعىنا وراي وسىدان 2 جىل بۇرىن ۇسىنىلىپ, كورەرمەندەر مەن مۋزىكا سىنشىلارى تاراپىنان جوعارى باعاعا يە بولدى. حوردىڭ كوركەمدىك جەتەكشىسى جانە باس ديريجەرى – قازاقستاننىڭ ەڭبەك سىڭىرگەن قايراتكەرى, پروفەسسور گۇلميرا قۇتتىباداموۆا, ديريجەرى – دانارا تاشاتوۆا, كونتسەرتمەيستەر – گۇلدەن بازىكەن.
