قوعامدىق كولىك تىزگىندەۋ – حالىقپەن ۇنەمى بايلانىستا بولۋدى تالاپ ەتەتىن جاۋاپتى جۇمىس. ارامىزدا جاۋاپتى قىزمەتتى ابىرويمەن اتقارىپ, باقىتىن وسى ىستەن تاپقان جاندار از ەمەس. سولاردىڭ ءبىرى – ەلوردانىڭ №1 اۆتوبۋس پاركىنىڭ جۇرگىزۋشىسى ديدار مولداباەۆ. ون ەكى جىل ىشىندە ول استاناداعى قوعامدىق كولىكتىڭ ءبىرتالايىن باسقاردى.
اۆتوبۋس ارتىنان جانۇشىرا جۇگىرەتىندەردى سابىرمەن كۇتىپ, ەشكىمنىڭ كوڭىلىن قالدىرماي ءبارىن مىنگەستىرىپ الۋعا دايىن ديدار مولداباەۆ بۇگىندە №22 باعدارداعى اۆتوبۋستى جۇرگىزەدى. 37 جاستاعى كەيىپكەرىمىزدىڭ بۇل سالاعا كەلۋى دە قىزىق. تاراز قالاسىنىڭ تۋماسى ەلورداعا كوشپەس بۇرىن جەرلەس دوسىمەن بىرگە جەرگىلىكتى اۆتوپاركتە قىزمەت ەتىپ ءجۇردى. العاشقىدا كوندۋكتور بولىپ باستاعان. كەيىن دوسىنىڭ ۇسىنىسىمەن 2013 جىلدىڭ ناۋرىزىندا ات باسىن استاناعا بۇرىپ, بىرگە تاجىريبەلىك سىناقتاردان ءوتىپ, №1 اۆتوبۋس پاركىنىڭ قاتارىنا قابىلدانادى.
«قوعامدىق كولىكتى تىزگىندەۋىمە وتباسىم دا سەبەپشى» دەپ باستادى اڭگىمەسىن كەيىپكەرىمىز. سەبەبى اكەسى ۇزاق جىلدار بويى جۇرگىزۋشى بولعان. ونىڭ ۇستىنە تۋعان اعالارى دا وسى سالانى تاڭداعان ەكەن. وزىنەن جاسى ۇلكەن ماقسات پەن مەدەت مولداباەۆتار دا – ەلوردالىق اۆتوبۋس جۇرگىزۋشىلەرى. ءبىرى №73 باعداردى جۇرگىزسە, ەكىنشىسى №61 مارشرۋتتى تىزگىندەيدى. اكە مەن اعا جولىن قۋعان ديدار مولداباەۆ ءۇشىن ءوزى ۇلكەن, ءىشى كەڭ قوعامدىق كولىكتىڭ رولىندە وتىرۋ ومىرلىك ماقساتىنا اينالادى. جۇمىسقا ەندى كىرىسكەن 25 جاسار جاس جىگىت اۋەلى 1998 جىلعى اۆتوبۋستىڭ ءبىرىن تىزگىندەدى. ارادا جىلدار ءوتىپ, كاسىبيلىگىن كورسەتە بىلگەننەن كەيىن 2015 جىلدىڭ جەلتوقسانىندا Iveco Citelis ماركالى اۆتوبۋسقا اۋىسىپ, №9, 23, 10 مارشرۋتتىڭ تىزگىنىندە وتىرادى. تاجىريبەسى مول جۇرگىزۋشى بۇگىندە Yutong اۆتوبۋسىن جۇرگىزەدى. وسىدان ون ەكى جىل بۇرىن جۇمىسقا ورنالاسقان ول ءالى كۇنگە دەيىن اۆتوبۋس كابيناسىنان اجىراعان ەمەس.
جۇمىس كەستەسى تىعىز. تاڭعى التىدا اۆتوپارككە جەتىپ, ديسپەتچەردەن جولداماسىن الادى, مەديتسينالىق تەكسەرۋدەن ءوتىپ بارىپ, گرافيك بويىنشا جۇمىسقا كىرىسەدى. ەڭ العاشقى رەيسكە التى جارىمدا شىعىپ, كەشكى ونعا دەيىن جۇمىس ىستەيدى. №22 اۆتوبۋسقا كۇن سايىن جۇزدەگەن ادام وتىرادى. ەكيپاجدا وسىنشاما ءومىر يەسىن تاسىمالداعان سوڭ, جۇرگىزۋشى موينىنداعى جاۋاپكەرشىلىك وراسان. ديدار مولداباەۆ ءار جولاۋشىنى ا-نۇكتەسىنەن ب-نۇكتەسىنە دەيىن امان-ەسەن جەتكىزۋ باستى مىندەتىم دەيدى. باسقا سالالاردا ءوزىن سىناپ كورگەن ول «وسى قىزمەتىم جانىما جاقىن» دەيدى.
«قاي قالانىڭ قوعامدىق كولىگىن تىزگىندەيمىن دەسەڭ, بىرىنشىدەن, سول قالانى جەتىك ءبىلۋىڭ قاجەت. استانا سەكىلدى مەگاپوليستەردە قانشاما جولاۋشى بار. حالىقپەن ۇنەمى بايلانىستا بولعاننان كەيىن ءتۇرلى ادامدار كەزىگەدى. ءبىرى راقمەت ايتىپ, ءساتتى كۇن تىلەسە, ەندى ءبىرى شۋ شىعارىپ, سوزگە كەلۋگە دايىن-اق تۇرادى. مۇندايدا باستىسى, سابىرلىق تانىتۋ كەرەك. كەز كەلگەنگە قاباق شىتپاي, كۇلىپ قاراساڭ, كۇنىڭ دە ءدال سولاي وتەدى.
مەن جۇرەتىن مارشرۋتتا ايتا كەتەتىنى – جول ماسەلەسى بار. جاڭا اۆتوبۋسپەن كۇنىنە بىرنەشە مارتە شۇڭقىر جەرلەردەن وتۋگە ارينە, جانىڭ اشيدى. 1,5 ميلليون اسا تۇرعىنى بار قالادا جولاقىسىن تولەمەيتىن ادامدار سانى دا ازايماي كەلەدى. ەلەكتروندى تولەم جۇيەسىن كىمدەر وتكىزگەنىن ەكران ارقىلى كورىپ, ەسەپتەپ, شامامەن قانشاسىنىڭ تولەگەنىن ءبىلىپ وتىرامىن. ماسەلەن, تاڭعى كەپتەلىس ۋاقىتىندا قىرىق ادام كىردى دەسەك, سونىڭ 7-8-ءى عانا تولەپ جاتادى. كولىككە اسىعا مىنگەن جولاۋشىلاردىڭ تولەۋگە اسىقپايتىنى راس.
كوشەدە وزگە كولىك جۇرگىزۋشىلەرى
تاراپىنان مادەنيەتسىز اسا بايقالمايدى, سۇرانعاندا وتكىزىپ جىبەرەتىندەر كوپ, ونىڭ ۇستىنە قازىر Bus-lane جولاعى دا وتە ءتيىمدى. دەسە دە, اسىعىپ-اپتىعاتىن جۇرگىزۋشىلەر بولادى. مۇندايدا مەن جولىمدى كەسىپ الدىما شىعىپ الاتىنداردى وتكىزە بەرەمىن. سولاردى جونىنە جىبەرىپ, 30 سەكۋند جوعالتقانىم اپاتتى جاعداي تۋدىرعاننان الدەقايدا جاقسى» دەيدى ول.
ومىرلىك جولىن جولاۋشى تاسىمالىمەن بايلانىستىرعان ديدار مولداباەۆ – ەكى ۇل, ەكى قىز تاربيەلەپ وتىرعان كوپبالالى اكە. كەز كەلگەن سالانى العا جىلجىتاتىن جاستار بولسا, كەيىپكەرىمىز اۆتوبۋس جۇرگىزۋشىسى بولامىن دەيتىن جاستار وتە سيرەك كەزدەسەتىنىن ايتىپ قالدى. بولاشاق مامانداردى وسى سالاعا تارتىپ, سۇيىكتى ءىسىن بىلىكتى جاس بۋىنعا تاپسىرۋ – ەندىگى ارمانى.
