استانادا بيىل قار جىلداعىدان كوپ جاۋدى. وسىعان بايلانىستى قالادا سۋ تاسقىنىنا قارسى ءىس-شارالار بەلسەندى جۇرگىزىلىپ جاتىر.
ەلوردا اكىمى جەڭىس قاسىمبەكتىڭ مالىمدەۋىنشە, وتكەن جىلدىڭ وسى كەزەڭىندە باس شاھار اۋماعىنان 3 ملن 800 مىڭ تەكشە مەتر قار شىعارىلسا, بيىلعى قىس ماۋسىمىندا 6 ملن 200 مىڭ تەكشە مەتردەن استام قار شىعارىلدى. قالا اۋماعىن قاردان تازارتۋ ىسىندە ىركىلىس جوق.
قازگيدرومەت بولجامى بويىنشا, ناۋرىز بەن ءساۋىر ايلارىندا دا جاۋىن-شاشىن مول جاۋاتىنىن, جالپى, جىل باسىنان بەرى جاۋىن-شاشىن مولشەرى نورمادان 2 ەسە كوپ بولعانىن ايتا كەلە, شاھار باسشىسى وسىعان بايلانىستى قالادا سۋ تاسقىنىنا قارسى ءىس-شارالار بەلسەندى جۇرگىزىلىپ جاتقانىن جەتكىزگەن بولاتىن.
– وتكەن جىلدارمەن سالىستىرعاندا سۋ تاسقىنى قاۋپى بار ۋچاسكەلەردىڭ سانى 20-عا دەيىن ازايدى. ولار – الماتى اۋدانىنداعى 5 ۋچاسكە, بايقوڭىرداعى 4 ۋچاسكە, نۇراداعى 6 ۋچاسكە, سارىارقاداعى 3 ۋچاسكە, ەسىل اۋدانىنداعى 2 ۋچاسكە. قازىرگى ۋاقىتتا شامامەن 45 مىڭ قۋما مەتردەن استام ارىق-ناۋا جەلىسى, 2 مىڭعا جۋىق باقىلاۋ جانە جاڭبىر قابىلدايتىن قۇدىق تازارتىلدى, 8 مىڭ قۋما مەترگە جۋىق كوللەكتور جۋىلدى, – دەدى اكىم.
ايتۋىنشا, بۇگىنگى تاڭدا ەلوردادا «نۇرا-ەسىل» كانالى مەن «مايبالىق» كولى اراسىندا ورنالاسقان كانالدى قاردان تازارتۋ جۇمىسى, نوسەرلى كارىز جۇيەلەرىنە زاڭسىز كىرمە جولداردى انىقتاۋ جانە ت.ب. جۇمىستار جۇرگىزىلىپ جاتىر.
جىل باسىنان بەرى استانادا 15,5 مىڭ تەكشە مەترگە جۋىق ارىق-ناۋا جەلىسى, 600-گە جۋىق باقىلاۋ جانە جاڭبىر قابىلداۋ قۇدىعى تازارتىلىپ, 160 تەكشە مەتر كوللەكتورلار جانە ت.ب. جۋىلدى. كوممۋنالدىق قىزمەتتەر قالا اۋماعىنان شامامەن 4,3 ملن تەكشە مەتر قار شىعاردى. قالادا سۋ تاسقىنى قاۋپى بار ۋچاسكەلەر سانى وتكەن جىلدارمەن سالىستىرعاندا 20-عا دەيىن ازايىپ, ازاماتتىق قورعاۋ ورگاندارى, كوممۋنالدىق قىزمەتتەر سۋ تاسقىنىنىڭ الدىن الۋ باعىتىندا اۋقىمدى شارالار ۇيىمداستىرۋدا. بۇل رەتتە ەلدى مەكەندەر مەن سۋ تاسقىنى قاۋپى بار ۋچاسكەلەرگە ەرەكشە كوڭىل ءبولىنىپ, اۋلالاردا جينالعان قاردى ۋاقىتىلى كۇرەۋ باقىلاۋعا الىندى. سۋ وتكىزگىش قۇبىرلاردى تازالاۋ مەن نوسەر كارىزىنىڭ جۇيەسىن سالۋ دا قاتاڭ باقىلاۋدا.
سارىارقا اۋدانىندا سۋ تاسقىنىنا قارسى ءىس-شارالار 15 اقپاندا باستالعان بولاتىن. وسىعان وراي, اۋلالارداعى قار جاپپاي شىعارىلىپ, تۇرعىن الاپتارداعى ارىق-ناۋا جەلىلەرى تازارتىلۋدا.
سۋ تاسقىنىنا قارسى ءىس-شارالار باستالعانعا دەيىن الدىن الۋ شارالارى بويىنشا كەڭەس وتكىزىلىپ, كوميسسيا قۇرىلدى. سونداي-اق كەشەندى ءىس-شارالار جوسپارى ازىرلەندى. اۋدان اكىمى ەرالى باۋىرجان بارلىق باسقارمالار مەن كوممۋنالدىق كاسىپورىندار, توتەنشە جاعدايلار دەپارتامەنتى باسقارمالارىنىڭ قاتىسۋىمەن وتكەن جيىن بارىسىندا تۇرعىن الاپتاردى سۋ باسۋدىڭ الدىن الۋ ماقساتىندا بىلتىر اۋداندا 19 اۋماققا سۋ وتكىزگىش قۇبىرلار ورناتىلىپ, بەتون ناۋالار ارقىلى قولدانىستاعى ارىقتار اباتتاندىرىلعانىن اتاپ ءوتتى. بۇل باعىتتا بيىل دا جۇمىس جالعاسۋدا.
الماتى اۋدانىندا «كازگيدرومەت» رمك, پيك قاۋىمداستىعى, سونداي-اق قالالىق باسقارمالاردىڭ قاتىسۋىمەن سۋ تاسقىنىنان قورعاۋ ماسەلەلەرى بويىنشا كەڭەس وتكىزىلدى. سۋ تاسقىنى كەزەڭىندە جۇمىستاردىڭ قاۋىپسىزدىگى مەن تيىمدىلىگىن قامتاماسىز ەتۋ ءۇشىن قار شىعارۋ جانە ارىق-ناۋا جەلىسىن تازارتۋ جونىندەگى ءىس-شارالار جوسپارى مەن جۇمىس كەستەسى بەكىتىلدى.
سۋ تاسقىنى كەزەڭىندە سورعىعا 79 بىرلىك تەحنيكا, سونىڭ ىشىندە موتوپومپالار, اس كولىكتەرى, ەكسكاۆاتورلار, متز سورعىلارى جانە پنس پايدالانىلادى. اۋدان اۋماعىنداعى قاردى شىعارۋ جانە سۋ تاسقىنى كەزەڭىنە دايىندىق جۇمىستارىن جۇرگىزۋ ءۇشىن بۇگىندە 70-تەن استام ساموسۆال مەن 300 قاپ قۇم دايىندالىپ, 174 مامانداندىرىلعان تەحنيكا, ونىڭ ىشىندە ساموسۆالدار, جۇك تيەگىشتەر جانە اۆتوگرەيدەرلەر جۇمىلدىرىلدى.
بەكىتىلگەن كەستەگە سايكەس قازىرگى كەزدە جەكە سەكتورداعى قاردى شىعارۋ جۇمىستارى باستالدى. تازارتىلعان قاردىڭ جالپى كولەمى قازىردىڭ وزىندە 1 088 284 تەكشە مەتردى قۇرايدى.
بايقوڭىر اۋدانى بويىنشا كوكتەمگى سۋ تاسقىنى كەزەڭىنە دايىندىق جۇمىستارى جالعاسۋدا. بۇگىنگى تاڭدا سۋ تاسقىنىنىڭ الدىن الۋ ماقساتىندا ارىق-ناۋا جەلىسىن تازارتۋ جۇمىستارى جۇرگىزىلىپ جاتىر. ءىس-شارا شەڭبەرىندە 112 كوشە تازارتىلىپ, جۇمىس بارىسىنا 30 بىرلىك مامانداندىرىلعان تەحنيكا جۇمىلدىرىلدى. ناتيجەسىندە شامامەن 5000 قۋما مەتر ارىق-ناۋا جەلىسى تازارتىلدى, 500 تەكشە مەتر اۋماققا ارنايى قوسپا جانە 1000 قاپ قۇم دايىندالدى.
سونداي-اق قالالىق توتەنشە جاعدايلار دەپارتامەنتى «كوكتەم-2024» رەسپۋبليكالىق كوماندالىق-شتابتىق وقۋ-جاتتىعۋلارىن وتكىزدى. وقۋ-جاتتىعۋ شەڭبەرىندە بارلىق 20 سۋ تاسقىنى قاۋپى بار ۋچاسكەلەر قامتىلدى. وندا قالانىڭ بەس اۋدانىندا قويىلعان مىندەتتەردىڭ ورىندالۋىن ۇيلەستىرۋ ءۇشىن شاعىن شتابتار ورنالاستىرىلدى.
