كوكتەمنىڭ العاشقى مەرەكەسى – 8 ناۋرىز سايىن اتاپ وتىلەتىن حالىقارالىق ايەلدەر كۇنى. ايەل – انا, ايەل – اپكە, ايەل – ءبىزدىڭ ۇستازدارىمىز, قالا بەردى – قارىنداسىمىز. راسىندا, مۇعالىمدەردىڭ كوبى نازىكجاندى ايەلدەر قاۋىمىنان. سوندىقتان دا, مەرەيلى مەرەكەنىڭ الدىندا شاكىرت تاربيەسىنە بار ءومىرىن ارناعان ۇستازدار قاۋىمىنا گازەتىمىزدىڭ ءبىر بەتىن ارنادىق. بۇنى ءبىزدىڭ مەرەكەگە وراي جولداعان قۇتتىقتاۋىمىز دەپ تە, ەل ءۇشىن ءسىڭىرىپ جۇرگەن ەرەن ەڭبەگىنە ايتار العىسىمىز دەپ تە قابىلداڭىزدار.
ءبىزدىڭ جولىمىز ءتۇسىپ, جۇزدەسكەن ۇستازدارىمىز – №7 مەكتەپ-گيمنازيانىڭ مۇعالىمدەرى. اۋەلگى سۇحباتىمىز 2 «ا» سىنىبىنىڭ جەتەكشىسى عاليا مامىربەكوۆامەن بولدى. كۇنى ەرتەڭ 53-ءشى كوكتەمىن قارسى العالى وتىرعان اپكەمىز اڭگىمەنى ەڭبەك جولىنا العاش قادام باسقان جىلداردان باستادى.
19 جاسىنان بەرى باستاۋىش سىنىپتارعا ساباق بەرىپ كەلە جاتقان عاليا اسانقىزى 1960-ىنشى جىلى دانا اباي, شاكارىم, مۇحتار تۋعان وڭىردە, تارباعاتاي تاۋىنىڭ باۋرايىندا ورنالاسقان ءۇرجار اتتى تابيعاتى اسەم اۋىلدا ناۋرىز ايىنىڭ ءۇشىنشى جۇلدىزىندا دۇنيەگە كەلگەن. اكەسى – كوبەلدەسۇلى اسان مەحانيزاتور بولعان ەكەن. ال, اناسى – كارىمقىزى سايلاۋحان بالاسىن جازۋ, سىزۋ, وقۋعا كىشكەنتايىنان ءۇيىر قىلىپ تاربيەلەپتى. 1975 جىلى ەگىنسۋ ورتا مەكتەبىن ۇزدىك بىتىرگەن ول قانىش ساتباەۆ, ساكەن سەيفۋللين, الكەي مارعۇلان سىندى دارىندى تۇلعالار ءبىلىم الىپ, ءدارىس بەرگەن سەمەي قالاسىنداعى مۇحتار اۋەزوۆ اتىنداعى پەداگوگيكالىق ۋچيليششەگە ءتۇسىپ, 1978 جىلى ءبىتىرىپ شىعادى. 1979 جىلدىڭ قاڭتار ايىنان باستاپ ءوزى وقىعان مەكتەبىندە ۇستازدىق قىزمەتىن باستاپ, سودان بەرى ۇزدىكسىز 34 جىل بويى وسى سالادا ەڭبەك ەتىپ كەلەدى. وسى ەڭبەك ءوتىلىنىڭ 27 جىلىن تۋعان جەرىندە وتكىزسە, سوڭعى 7 جىل بويى ەلوردامىزدا زامانعا لايىق جاڭا تەحنولوگيالارمەن ساباق بەرىپ كەلەدى.
قالالىق باسىلىمدار ارقىلى ءارىپتەستەرىمەن تاجىريبەسىن ءبولىسۋمەن كەلگەن ۇستازدىڭ ءبىراز ەڭبەكتەرى بار ەكەن: 2000, 2009, 2010 جىلدارى ديكتانتتار جيناعىن, «ماتەماتيكا پانىنەن لوگيكالىق تاپسىرمالار جيناعى 1-4 سىنىپ» ادىستەمەلىك قۇرالىن, «وقۋ ۇردىسىندە سىن تۇرعىسىنان ويلاۋدى دامىتۋ» جوباسىن پايدالانۋ», «ەسەپكە جۇيرىك ەكەنبىز» اتتى كىتاپشا جانە «ماتەماتيكا پانىنەن لوگيكالىق تاپسىرمالار» سىندى بىرقاتار جيناقتارىن جارىققا شىعارىپتى.
«شاكىرتسىز ۇستاز – تۇل». بۇگىندە ءوزى تاربيەلەپ كەلە جاتقان باستاۋىش سىنىپ وقۋشىلارى ىشىنەن ءبىلىم جانە ونەر سايىستارىندا توپ جارىپ جۇرگەندەرى از ەمەس. «ءسوز مارجانى» اتتى جاس جۇرگىزۋشىلەر اراسىندا وتكەن قالالىق بايقاۋدا «ساحنانىڭ كۇمىس داۋىسى» اتالىمى بويىنشا كاميلا مەلدەقۇل مەن دياس حامزەنوۆ ديپلوممەن ماراپاتتالسا, تاعى ءبىر وقۋشىسى ارۋجان ساعىندىق استانا قالاسى ءبىلىم باسقارماسى «استانا دارىنى وعپو» قالالىق «زەردە» زەرتتەۋ جۇمىستارى مەن شىعارماشىلىق جوبالار كونكۋرسىنىڭ «بيولوگيا» سەكتسياسى بويىنشا ەرەكشە كورسەتكەن جەتىستىكتەرى ءۇشىن ءىىى ورىنعا يە بولعان. ءدال وسى سايىس-تا «ونەر» سەكتسياسى بويىنشا مەرحات كاكەن ەسىمدى شاكىرتى توپ جارعان. سونىمەن قاتار, قالالىق «بۇرىمدى قىز» بايقاۋىندا ءبيبىنۇر ماقسوتوۆا جانە اجار بەيسەمباەۆا ديپلوممەن ماراپاتتالعان, ت.ت. بۇلار – مەكتەپ تابالدىرىعىن كەشە عانا اتتاعان ءبىرىنشى, ەكىنشى سىنىپ وقۋشىلارىنىڭ تىرناقالدى جەتىستىكتەرى. «تالاپتىعا دەم بەرسە, تاۋداي اسۋ اسادى» دەمەكشى, تالپىنىسىنا قانات بىتىرەتىن ۇستازدارى بولسا, دارىندى شاكىرتتىڭ الار بيىگى الدا دەپ سەنۋ ءلازىم.
عاليا اپايىمىزدىڭ ەڭبەگى ەلەۋ-ءسىز دەپ ايتا المايمىز. وسىعان دەيىن ءوزى دە تالاي رەت العىس الىپ, ماراپاتقا يە بولىپتى. «سونىڭ ىشىندە ەڭ ورنى جوعارىسى «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» اتتى مەدال» دەيدى ءوزى. ورنى ەرەك ماراپاتتارىنىڭ تاعى ءبىرى – قالالىق ءبىلىم باسقارماسىنىڭ «استانانىڭ جىل مۇعالىمى» كونكۋرسىندا «ىزدەنىمپاز مۇعالىم» اتالىمى بويىنشا بەرگەن قۇرمەت گراموتاسى. وسى سىندى كوپتەگەن ماداقتامالار ۇستازدىڭ ىزدەنىمپازدىعىنىڭ, ەڭبەگىنە ادالدىعىنىڭ جانە تالماي, تاباندى تۇردە جاساپ كەلە جاتقان جۇمىسىنىڭ جەمىسى دەپ بىلەمىز.
ەربول جانات
