«نۇر وتان» پارتياسىنىڭ «جاس وتان» جاستار قاناتى «ءساتتى قادام» جوباسىنىڭ جاڭا باعىتىن قولعا الاتىنىن مالىمدەدى. اتالمىش ۇيىم ەندى كوللەدج بەن ۋنيۆەرسيتەتتى تامامداعان جەتىم بالالاردى جۇمىسقا ورنالاستىرادى.
«جاس وتان» توراعاسى شاحماردان بايمانوۆتىڭ ايتۋىنشا, بيىلعى وقۋ جىلىن بىتىرۋشىلەردىڭ اراسىندا 3600 ورەن – جەتىم بالالار. ولاردىڭ 2441-ءى تەحنيكالىق ءبىلىم الىپ شىقسا, 1192-ءسى – جوعارى وقۋ ورنىنىڭ تۇلەكتەرى.
«ءساتتى قادام» جوباسىنىڭ جاڭا باعىتى بويىنشا 172-دەن استام كاسىپورىن, ولاردىڭ ىشىندە «قازاقستان تەمىر جولى», «بايان سۇلۋ», «ورەول», «وسكەمەن قاعاز زاۋىتى», «قازپلاست», «مۋتلۋ-گيپس», «پاۆلودار مۇناي حيميا زاۋىتى» سىندى كومپانيالار بىرلەسىپ جۇمىس ىستەۋگە كەلىسىپ وتىر.
«وسى ساناتتاعى بارلىق تۇلەكتەردى قىزمەتكە تۇرعىزامىز دەپ ايتا المايمىز. سەبەبى ءاربىر كومپانيانىڭ ءوز تالاپتارى بار. دەگەنمەن, ءبىز ناقتى قاي ايماقتا قانداي مامان قاجەت ەكەنىن بىلەمىز. سول اقپاراتقا سۇيەنىپ جاستارعا باعىت بەرەمىز» دەيدى ش.بايمانوۆ. ونىڭ ايتۋىنشا, جەتىم بالالاردى تەك وندىرىستىك وشاقتارعا عانا ەمەس, باسقا دا كاسىپورىندار مەن مەكەمەلەرگە ورنالاستىرۋ ماسەلەسى قارالاتىن بولادى.
بوتاگوز ماراتقىزى
