تىيىم سالىنعان جەرلەرگە قوقىس توگۋ ەلوردانىڭ ەكولوگيالىق احۋالىنا كەرى اسەر ەتەتىنى ءسوزسىز. وسىنداي زاڭسىزدىقتاردى رەتتەۋ جانە الدىن الۋ ءۇشىن شاھار باسشىسى ادىلبەك جاقسىبەكوۆ ارنايى جۇمىس توپتارىن قۇرىپ, رەيدتەر جۇرگىزۋدى تاپسىرعان-دى. اتالمىش شاراعا ءبىز دە قاتىسىپ, تازالىق ماسەلەسىنە قاتىستى ءتارتىپ بۇزۋشىلىق فاكتىلەرىن تەكسەردىك.
اۋدان اكىمدىكتەرى, ەكولوگيا دەپارتامەنتى, تۇتىنۋشىلاردىڭ قۇقىقتارىن قورعاۋ دەپارتامەنتى, تابيعي رەسۋرستار جانە تابيعات پايدالانۋدى رەتتەۋ باسقارماسى, تابيعاتتى قورعاۋ پوليتسياسى, «استانا ەكو-پوليگون نس» جانە «استانا تازارتۋ» كاسىپورىندارى وكىلدەرىمەن بىرگە اۋەلى «Royal Park City» قالاشىعىنا باردىق. ات شاپتىرىمداي ۇلكەن اۋماقتا تاۋ-تاۋ قالدىق ءۇيۋلى جاتىر ەكەن. تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ساكەن يساەۆتىڭ ايتۋىنشا, جەر پايدالانۋشى ءوز ۋچاسكەسىنىڭ سانيتارلىق جاعدايىن باقىلاۋعا ءتيىس. ياعني, تەرريتوريا تولىقتاي كۇزەتىلىپ, ناقتى ماقساتتا يگەرىلۋى كەرەك.
– كومپانيا ءىرى كاسىپكەرلىك سۋبەكتىسىنە جاتاتىندىقتان, وعان 200 اەك مولشەرىندە ايىپپۇل سالىنادى جانە قىسقا مەرزىمنىڭ ىشىندە قوقىستى اكەتۋ تۋرالى ۇيعارىم شىعارىلادى, – دەدى ەكولوگيا دەپارتامەنتى باسشىسىنىڭ ورىنباسارى مانسۇر وشىرباەۆ.
رەيد كەزىندە تاعى ءبىر تارتىپسىزدىكتىڭ ۇستىنەن تۇستىك. وسى اۋماقتا سۇيىق تۇرمىستىق قالدىقتار توگەتىن اسسەنيزاتورلىق ماشينا جۇرگىزۋشىسى ۇستالىپ, ول 20 اەك, ياعني, 42420 تەڭگە كولەمىندە جاۋاپكەرشىلىككە تارتىلدى. نەگىزى, پوليتسيا ينسپەكتورلارى تۇراقتى تۇردە تەكسەرىس جۇرگىزىپ, سونىڭ ناتيجەسىندە جىل باسىنان بەرى استانا قالاسىندا بەلگىلەنبەگەن جەرلەرگە قوقىس تاستاعانى ءۇشىن 28 جۇك كولىگى مەن 33 اسسەنيزاتورلىق ماشينانى قولعا ءتۇسىرىپتى.
بۇدان بولەك, توقپانوۆ كوشەسىنىڭ بويىندا ورنالاسقان قۇرىلىس نىسانىنا تيەسىلى مەكەننەن دە قوقىس تابىلدى. عيماراتتى سالۋشى كومپانياعا قازاقستان رەسپۋبليكاسىنىڭ اكىمشىلىك كودەكسى بويىنشا پروتوكول تولتىرىلىپ, ءۇيىندىنى شىعارۋعا ۋاقىت بەرىلدى. كاسىپورىنداردىڭ نەلىكتەن مۇنداي زاڭسىزدىقتارعا باراتىنىن سۇراعانىمىزدا, ماماندار وسىلايشا كوپ فيرمالاردىڭ قارجى ۇنەمدەگىسى كەلەتىنىن ءتۇسىندىردى. مىسالى, ەكوپوليگونعا كومىلەتىن قوقىستىڭ تونناسى ءۇشىن 3500 تەڭگە تولەۋ قاجەت ەكەن. ال فيرمالار مۇنداي «شىعىننان» جالتارادى.
جالپى, قۇرىلىس قالدىقتارىن پوليگونعا اپارمايتىن, اپارسا دا ۋاقىتىلى تاسىمايتىن فيرمالار جەتەرلىك. سولاردىڭ ءبىرى – «تەمىررەمسترويسەرۆيس» جشس قازىرگى تاڭدا «Astana Mall» ويىن-ساۋىق ورتالىعىنىڭ جانىندا تۇرعىن ءۇي عيماراتىن سالۋدا.
– كومپانيا ءبىر اپتادان ارتىق ۋاقىت بويى قۇرىلىس بارىسىندا جينالعان قوقىستى شىعارماعان. اباتتاندىرۋ ەرەجەلەرىنە سايكەس, قۇرىلىس-مونتاجداۋ جۇمىستارىنان كەيىن جينالعان قوقىستى كۇن سايىن شىعارۋ كەرەك, – دەدى الماتى اۋدانى اكىمدىگىنىڭ اباتتاندىرۋ ءبولىمى باسشىسى راميل دوسماعانبەتوۆ.
ءوز كەزەگىندە «تەمىررەمسترويسەرۆيس» جشس ۋچاسكەسىنىڭ باسشىسى بەيىمبەت قاجەنوۆ ەندىگارى مىندەتتەردى مۇقيات ورىنداپ, قۇرىلىس قالدىقتارىن كۇن سايىن شىعارىپ تۇرۋعا ۋادە ەتتى.
تازالىق ماسەلەسىنە سەلقوس قارايتىنداردىڭ ءبىرى – قىزمەت كورسەتۋ سالاسىمەن اينالىساتىن ۇيىمدار ەكەن. شارانىڭ ءتورتىنشى پۋنكتى «استانالىق» بازارىنىڭ ماڭى بولدى. سابىر راحىموۆ كوشەسىندەگى «رىزا» ءدامحاناسىنىڭ ارتقى اۋلاسىنا كىرگەنىمىزدە, قولقانى قاپقان جاعىمسىز يىستەن جۇرەگىمىز اينىدى. باقساق, كافە جۇمىسشىلارى ارتىلعان اس-اۋقاتتىڭ ءبارىن وسى تۇسقا توگەتىن كورىنەدى.
– وسى اپتادان كافە اۋماعىندا سەنبىلىك ۇيىمداستىرعالى جاتقانبىز. قالدىقتىڭ ءبارىن تازالايمىز. جۇمىسشىلارىم بىلمەستىكپەن توككەن شىعار, – دەپ جاۋاپ قاتتى بىزگە ءدامحانا يەسى قۇرالاي يزەكەەۆا.
وعان دا ينسپەكتورلار تاراپىنان پروتوكول تولتىرىلىپ, ءتيىستى مولشەردە ايىپپۇل سالىندى.
بوتاگوز ماراتقىزى
