بىلە بىلسەك, مۇسىلمان بالاسى ءۇشىن قاسيەتتى قاعبانى اينالىپ, قاجىلىق پارىزدى وتەۋ – اسىل ارمان, بەرەكەلى بەلەس, مارتەبەلى ماقسات دەسە بولعانداي. وسىنداي مەيىرىم تولى ساپارعا شىعىپ, جان-جۇرەگىن يمانعا بولەپ كەلگەن وسپان سۇلەيمەنۇلىنىڭ «ۇلىق ساپار اسەرلەرى نەمەسە رياسىز قۇلشىلىق» اتتى كىتابى قولىما تيگەندە قاجىلىق پارىزدىڭ قانشالىقتى ۇلى قۇلشىلىق ەكەنىن ۇققانداي بولدىم.
«ءتاپسىنىڭ اسىل تاسىنداي,
جۇرەكتەن شىققان جىرلارىم.
بەسىنشى ۇلكەن پارىزىڭ,
ۇعارسىڭ وقىپ سىرلارىن» دەپ باستالعان يماندىلىق داستانى قاجىلىق ساپاردىڭ قۇدىرەتىن قارا ولەڭمەن ءورىپ كورسەتكەنىمەن, قاستەرلى بولىپ كورىندى. وقىپ وتىرعاندا جان-جۇرەگىڭە يماندىلىقتىڭ شاپاعاتى ۇيالاپ جاتقانداي سەزىنەسىڭ. وسپان سۇلەيمەنۇلى يماندىلىقتى تۋ كوتەرگەن داستانى ارقىلى ادامگەرشىلىكتىڭ ەڭ اسىل قاسيەتتەرىن ۋاعىزداپ, ادام بالاسىنىڭ ءبىر-بىرىنە دەگەن مەيىرىمدىلىگى مەن قايىرىمدىلىعى جايىندا جىرلايدى. الەۋمەتتى ساۋاپتى ىسكە ۇندەيدى.
كىتاپتىڭ ەكىنشى بولىمىندە اۆتور ءار كەزەڭدە قاجىلىق ساپارعا بارعان زامانداستارىن ارداقتاپ, ولاردىڭ رياسىز قۇلشىلىق جاساۋ كەزىندەگى سۋرەتتەرىن بەدەرلەپ كورسەتكەن. ونىسىمەن قاجىلىق پارىزدى وتەۋدىڭ قانشالىقتى ءمارتەبەلى, قاسيەتتى, ساۋاپتى ءىس ەكەنىن اڭعارتادى.
تۇپتەپ ايتقاندا, بۇكىل سانالى عۇمىرىن ۇستازدىققا ارناعان, مۋزىكا ءپانىنىڭ مۇعالىمى بولعان وسپان قاجى سۇلەيمەنۇلىنىڭ ۇلىق ساپاردىڭ قۇدىرەتى جايلى جازعان يماندىلىق داستانى كوپشىلىكتىڭ كوكەيىنە قوناتىن, جۇرەگىنە جول تاباتىن شىرايلى شىعارما بولعانىن ايتقىمىز كەلەدى. ۇلاعاتتى ۇستازدىڭ, ارداقتى ازاماتتىڭ, ونەگەلى ونەرپازدىڭ يگىلىگى جاس ۇرپاققا جۇعىستى بولعاي دەمەكپىز.
عالىم قوجابەكوۆ
