استانا نامىسىن ماليكا قورعايدى
استانادا ءاليا نازارباەۆانىڭ «بالا داۋىسى» ءى ۇلتتىق بالالار ءان بايقاۋىنىڭ ىرىكتەۋ كەزەڭى ۇيىمداستىرىلدى. ماحامبەت وتەمىسۇلى اتىنداعى وقۋشىلار سارايىندا وتكەن دودادا 7 مەن 13 جاس ارالىعىنداعى 185 ەلوردالىق ۇل-قىز ءوزارا سىنعا ءتۇستى.
ولار شىرقاعان وتان, باقىتتى بالالىق شاق جانە ءتاتتى ارماندار تۋرالى اندەر «رينگو» توبىنىڭ ءسوليسى دانيار وتەگەن باستاعان قازىلار القاسى مۇشەلەرىنە قاتتى ۇنادى. دانيار – وسى بايقاۋدىڭ استانا قالاسى بويىنشا تالىمگەرى. ياعني, باس شاھاردان شىققان جەڭىمپازدى رەسپۋبليكالىق جارىستىڭ بيىلعى كۇزدە بولاتىن فينالىنا دايىندايدى.
– دودا بارىسىندا تاڭداۋ جاساۋ ەش وڭايعا تۇسپەگەنىن مويىنداۋىمىز كەرەك. مۇندا تەك جۇزدەن جۇيرىك, مىڭنان تۇلپار بالالار عانا كەلدى. ارقايسىسىنا مۇقيات كوڭىل ءبولىپ, اندەرىن جۇرەگىمىزبەن تىڭدادىق. ءالى الدا قيىن ءارى قىزىقتى جول كۇتىپ تۇر. اقتىق سايىسقا جولداما العان دارىندى بۇلدىرشىندەردىڭ ءبارى قازان ايىندا الماتى قالاسىنا جينالىپ, «بالا داۋىسى» ستۋدياسىنان ءتالىم الادى. سونىمەن بىرگە, ءار بالاعا ارناپ جاڭا ءان جازىلادى. كونكۋرستىڭ نەگىزگى ەرەكشەلىگى دە سوندا, – دەيدى دانيار.
بايقاۋ قورىتىندىسىنا وراي «استانانىڭ ەڭ ۇزدىك بالا داۋىسى» نوميناتسياسىنا 13 جاستاعى ماليكا سماعۇلوۆا يە بولدى. ءماليكا ەلورداداعى №54 مەكتەپ-ليتسەيدە وقيدى جانە ايمان مۇساقوجاەۆانىڭ مۋزىكا مەكتەبىندە ءبىلىم الادى ەكەن. تالانتتى جەتكىنشەك 5 جاسىنان باستاپ ءان ايتىپ, فورتەپيانودا ويناپ, ءوز رەپەرتۋارىن دجاز, پوپ جانە R&B مانەرىندەگى اندەرمەن تولىقتىرۋدا. جەڭىمپاز اتانعانىن ەستىگەن بويدا ول:
– كەۋدەمدى ەرەكشە سەزىم كەرنەپ تۇر. بۇگىن مەن ءانشى بولسام دەگەن ىزگى ارمانىما ءبىر قادام جاقىنداي تۇسكەندەيمىن. الداعى بەلەستەردەن دە سۇرىنبەي وتۋگە تىرىسامىن. ماعان قولداۋ بىلدىرگەندەرىڭىزگە مىڭ العىس! – دەپ ىستىق لەبىزىن جەتكىزدى.
«تالپىنعان جەتەر مۇراتقا» دەمەي مە حالىق؟! ىزدەنىمپاز ونەرپازدىڭ بولاشاعىنا ساتتىلىك تىلەيمىز.
بوتاگوز ماراتقىزى