БӘСЕКЕЛЕСТІК ОРТА ҚАЛЫПТАСТЫРУДЫҢ ТИІМДІ ЖОЛЫ
Елімізде мүлік пен капиталды жария ету акциясымен қатар, мемлекеттің қатысуындағы коммуналдық меншікті жекешелендіру жұмыстары да жүріп жатыр.
Осыдан екі жылдай бұрын Елбасы өз Жолдауында еліміздегі стратегиялық емес нысандарды жекешелендіріп, бәсекелі ортаға тапсыру жөнінде тапсырма бергені белгілі. Бұл бағыттағы жұмыстар Астана қаласында да жүргізілуде.
Осыған байланысты елордада коммуналдық заңды тұлғаларды жекешелендіру жұмыстары әрі қарай жалғасып жатыр.
Астана қаласы Қаржы басқармасының мәліметіне сүйенсек, қазірдің өзінде бәсекелі ортаға 11 коммуналдық меншіктегі заңды тұлға беріліп үлгерген. Кәсіби емес активтерді сату жөніндегі жұмыстарды қарқынды әрі тиімді жүзеге асыру үшін бас қалада 2014-2016 жылдарға арналған жекешелендірудің кешенді жоспары бекітілген.
Қаржы басқармасының ақпараты бойынша аталған жоспарға сәйкес, Астана бойынша 38 заңды тұлға жекешелендіруге жатады. Олардың ішінде 11-і – 2014 жылы, 7-еуі – 2015 жылы, 20-сы 2016 жылы жекешелендіріледі деп жоспарлануда.
Бұдан өзге, кешенді жоспарларды орындау мақсатында Астана қаласы Кәсіпкерлер палатасы өкілдерінің қатысуымен квазимемлекеттік сектор субьектілері мен мемлекеттік жылжымайтын мүлік нысандарын оңтайландыру бойынша комиссия құрылған. Бұл комиссия коммуналдық меншіктегі нысандарды тиімді пайдалануға жан-жақты сараптама жүргізіп, жекешелендіруге жататын басқа да квазимемлекеттік кәсіпорындарды анықтайтын болады.
Қаржы басқармасының мәліметінше, кең ауқымды қамтитын жекешелендіру үдерісі мынадай нәтижелерге алып келмек: біріншіден, жергілікті атқарушы органдар кәсіби емес активтер мен өзінің қызметінен тыс жұмыстардан босап, коммуналдық заңды тұлғалар саны оңтайландырылатын болады. Бұл жергілікті мемлекеттік мекемелердің қызмет сапасын арттыра түспек.
Екіншіден, қала экономикасындағы осыған дейін мемлекеттің қатысуымен құрылған кәсіпорындардың орны босап, шағын және орта бизнестің дамуына қосымша серпін береді. Сонымен қатар, мемлекеттік мүлікті сатудан бюджетке қосымша қаржы түсетіні айтпаса да түсінікті.
Есте ұстайтын жайт, жекешелендіру нысандарын сату жөніндегі ережелер бойынша, оларды сату мемлекеттік мүлікті жекешелендіру бойынша аукцион және тендер түрінде www.gosreestr.kz. веб-порталы арқылы электрондық сипатта өткізіледі. Аталған сайттың электрондық сату бөлімінде жекешелендіруге шығарылған мемлекеттік нысандар жөнінде кеңінен танысып, толыққанды мағлұмат алуға болады.