Мемлекет басшысы Нұрсұлтан Назарбаев «Қазмедиа» орталығында «Қазақстанның 100 жаңа есімі» жобасының жеңімпаздарымен кездесті. Айтулы жобада есім-сойы ерекшеленген 29 жастың 15-і, яғни тең жартысы – Астана қаласының тұрғыны. Бұл елорда жаңа идея мен жастар энергиясының символына айналғанын айғақтайды.
Тәуелсіздік жылдарында қалыптасқан еліміздің ерекше талантты және тұлғалық сипатқа ие адамдарын анықтауға бағытталған республикалық бұл жобаның екінші маусымы 2018 жылдың қыркүйек айында басталды.
Бұл жолғы «100 жаңа есімге» қатысуға 2388 өтінім берілген. Сарапшылар тобы жоба талаптарына сай 200 үміткерді анықтаған. Соңында онлайн дауыс беру арқылы 29 адам жеңімпаз ретінде танылды. Олардың қатарында қоғам, спорт, білім, мәдениет, бизнес, ІТ, медицина, ғылым және БАҚ саласының мамандары бар.
