«Garage» стартап алаңы ашылды
Елордада Astana Hub IT-стартаптардың халықаралық технопаркінде жаңа жобаларға арналған «Garage» тегін бағдарламасы іске қосылды.
Шараға келген ҚР Ақпарат және коммуникациялар министрі Дәурен Абаев алдымен стартап жобалармен жақынырақ танысты. IT мамандар осында келіп, өз идеяларын тестілеуге, жобаны әрі қарай дамытуға мүмкіндік алады.
– Мемлекет басшысының тапсырмасына сай «Цифрлық Қазақстан» бағдарламасы жан-жақты жүзеге асып жатқанын жақсы білесіздер. Сондықтан технопарк дарынды IT мамандар үшін жаңа технологиялар мен бастамалардың алаңына айналатынына сенімдіміз. Бұл алаң ұлттық инновациялық экожүйенің өзегі болуы тиіс. Технопаркке отандық және шетелдік стартаптарды тарта отырып, цифрлық экономиканы қолдау үшін барлық жағдайды жасауға тырысамыз. Astana Hub-тың негізгі мақсаты – 2025 жылға қарай жергілікті IT компаниялардың капиталын 1 млрд АҚШ долларына жеткізу.
Біз ашып отырған акселерациялық бағдарлама Астананың 20 жылдығында өтіп жатқаны қуантады. Енді бір 20 жылдан кейін отандық компаниялар әлемдік элитада өз орнын ойып тұрып алуына мүмкіндік туады деп үміттенемін, – деді министр.
ЭКСПО аумағында құрылатын «Astana Hub» IT-стартаптардың халықаралық технопаркі осы жылдың соңына дейін, нақтырақ айтсақ, қыркүйекте ашылады деп күтілуде.
Гүлдана ТАЛҒАТҚЫЗЫ