23 қарашадан бастап еліміздің барлық кинотеатрларында «Коконың құпиясы» атты диснейлік мультфильмін тамашалай аласыздар. Қазақ тілінде. Иә, бұл – «Болашақ» қауымдастығының бастамасымен осымен 23-рет қазақша дубляждалып отырған анимациялық фильм.
Мигель есімді мексикалық баланың басынан өткен хикая ешкімді бей-жай қалдырмайды. Қашан да отбасылық құндылықтарды дәріптейтін «Дисней» бұл жолы «Өлі разы болмай, тірі байымайды» дегенді алға тартады. Сюжет желісі бойынша, Мигель танымал музыкант болуды армандайды. Алайда үй-іші оған түбегейлі қарсы. Кезінде ән айтып, би билеп, отбасын өнерімен асырап жүрген атасы бір күні үйіне оралмайды. «Ол бізді тастап кетті» деп топшалаған Эмильда әже үйдегі бар музыкалық аспаптарды далаға лақтырып тастап, аяқ-киім тігуге білек сыбана кіріседі. Кәсіп ұрпақтан ұрпаққа жалғасады. Міне, осы тұстан бастап әулеттің қалыптасқан қағидасы бойынша ешкімнің музыкамен айналысуына рұқсат берілмейді. Музыканың кесірінен күйеуінен айырылған Эмильда әженің қызы Коко құпиясын немересі ашуға тырысады.
Дубляж режиссері ретінде астаналық әртіс Шах-Мұрат Ордабаев таңдалынып алынды. Ал 12 жасар Мигельдің дауысын Қ.Қуанышбаев атындағы Мемлекеттік академиялық қазақ музыкалық драма театрының актерлері Нұркен Өтеуілов және Айнұр Бермұхамбетованың ұлдары Ақарыс Әшімхан салды.
«Ақшамның» анықтамасы:
• Жобаға тартылған ең жас әртіс – Ақарыс Әшімхан 12 жаста, ал жасы ең үлкен әртіс, ҚР Халық әртісі, профессор Құралай Ешмұратова 73 жаста.
• Әртістерге қойылған басты талап – міндетті түрде ән айта білу, себебі мультфильм кейіпкерлері күрделі вокал партияларын орындайды.
• Өзін сынап көрген 25 баланың ішінен үздік болып танылған Ақарыс Әшімхан дубляжды 5 күннің ішінде жасаған.
«Жұмыстың бес күні де ұнады, өте қызық өтті. Режиссер Шахмұрат ағаны тыңдамайтын кездерім де болды. Басты кейіпкер өнерге жақын, ән айтқысы келеді. Мультфильмде төрт ән бар, соның барлығын өзім орындап шықтым. Фильм балаларды достыққа баулу, ата-аналарды құрметтеу, ата-бабаларды ұмытпауға шақырады» дейді жас әртіс.
