Astana qalasy äkımınıŋ orynbasary Eset Baikennıŋ qatysuymen ötken elorda mäslihatynyŋ kezekten tys sessiiasynda şahardyŋ 2022-2024 jyldarǧa arnalǧan biudjetıne engızılgen özgerıster talqylandy. Atalmyş özgerıstermen qalalyq Ekonomika jäne biudjettık josparlau basqarmasy basşysynyŋ mındetın atqaruşy Aijan Tügelbaeva tanystyrdy.
Onyŋ mälımdeuınşe, jeke kırıs boiynşa jospardy 3,1 mlrd teŋgege ösırıp, 556,7 mlrd teŋgege deiın jetkızu ūsynyldy. Salyq tüsımderı, salyqtyq emes tüsımder, negızgı kapitaldy satudan tüsetın tüsımder de ösırıldı. Bırqatar basqarmalarǧa da qosymşa qarjy bölınedı.
Atap aitqanda, Otyn-energetika keşenı jäne kommunaldyq şaruaşylyq basqarmasyna 2 mlrd 481,8 mln teŋge qosymşa qarjy bölıngen. Sonyŋ jartysy Elorda Eco System JŞS-ne nöser kärızderın ūstauǧa jäne tazartuǧa, 797 mln teŋge osy kompaniiaǧa 10 arnauly tehnikany satyp aluǧa baǧyttalady. 484 mln teŋge «Astana Tazalyq» JŞS-ne qajettı qūral-jabdyqtardy aluǧa jūmsalady.
Qorşaǧan ortany qorǧau jäne tabiǧatty paidalanu basqarmasyna qosymşa bölınetın 133,3 mln teŋge Astananyŋ «Jasyl beldeuı» aumaǧyndaǧy jasyl jelekke arnalǧan. Qalalyq orta sapasy jäne baqylau basqarmasyna qosymşa 98,6 mln teŋge qosymşa bölınedı. Būl qarjy qalalyq monitoring jäne jedel äreket etu ortalyǧy qyzmetkerlerınıŋ jalaqy qory ösuıne bailanysty bölınıp otyr.
Almaty jäne Esıl audandarynyŋ äkımdıkterıne eldı mekenderdı abattandyru jäne kögaldandyruǧa säikesınşe 218 mln jäne 235 mln teŋge qosymşa qarjy qarastyrylǧan. Astana qalasy äkımdıgı apparatynyŋ qarjysy kerısınşe «Aumaqtyq qorǧanysqa daiyndyq» baǧdarlamasy boiynşa 98,6 mln teŋgege azaityldy.
Qoǧamdyq densaulyq saqtau basqarmasyna ışınara 363 mln teŋge bölındı. Osylaişa osy özgerıstermen Astana qalasynyŋ 2022 jylǧy biudjetı 789 mlrd 41 mln teŋgenı qūraidy.
Qalalyq mäslihat deputattary Azamat Aithojin, Güljamal Japarova, Dinara Orazalina mümkındıgı şekteulı jandardyŋ qajettılıkterı mäselelerın köterdı. Deputat Batyr Kotyrev qala tūrǧyndarynyŋ tūtynuyna qajet su mölşerı artyp kele jatqanyn aita kele, «Astana Su arnasy» mekemesıne de qosymşa qarjy bölu kerektıgın jetkızdı.
Qalalyq mäslihat hatşysy Erlan Kanalimov oǧan Y.Altynsarin atyndaǧy №83 mektep-gimnaziia basşylyǧy men ata-analardan ötınış kelıp tüskenın aityp öttı.
– Osy mektep 2016 jyly inkliuzivtı baǧytta bolady dep aşylǧan. Qazır osynda inkliuzivtı bılımmen 140 oquşy qamtylǧan. Bıraq olardyŋ sabaqtary törtınşı qabatta ötedı. Mektepke qosymşa retınde lift salu kerek. Oǧan 29 million teŋge bölu kerek. Būl mäselenı dereu şeşıp, biyl tiianaqtau qajet. Qalada jalpy 30 inkliuzivtı synyp bar. Olardyŋ barlyǧynyŋ qajettılıkterın saralau kerek, – dedı mäslihat hatşysy.
Atalmyş mäsele boiynşa jauap bergen Qūrylys basqarmasynyŋ basşysy Tölegen Qūlyşev tiıstı konkurs jariialanǧanyn, tek qana qarjyny kütıp otyrǧandaryn jetkızdı.
Erlan Kanalimov autist balalarmen jūmys ısteitın mamandar joq ekenın, osy mäselenı qolǧa alu kerektıgın aitty. Osy oraida mäslihat deputaty Läzzat Razbekova-Töleuhanova elordada defektologtar men logopedterdı daiyndaityn bırde-bır oqu orny joqtyǧyn aita kele, olar Şyǧys Qazaqstan jäne Qaraǧandy oblystarynan tartylyp jatqanyn jetkızdı.
– Būl – ülken problema. Sondyqtan qazır qalada bar oqu oryndary bazasynda osy mamandyqtardy oqytudy engızu kerek. Mäselen, elordada gumanitarlyq kolledj bar. Osy mäselenı qarastyrǧan jön, – dedı deputat.
Mäslihat hatşysy defektolog pen logopedterdı «Astana» halyqaralyq universitetınde oqytuǧa bolatynyn esepteitının aityp, osy mäselenı Bılım basqarmasyna baqylauǧa aluyna tapsyrdy.
