Şäken Aimanov atyndaǧy «Qazaqfilm» AQ baspasöz qyzmetınıŋ osy aptada taratqan mälımetı boiynşa, Aqan Sataevtyŋ «Jaujürek myŋ bala» filmınıŋ alǧaşqy körsetılımınen tüsken qarjy otandyq kino öndırısındegı rekordtyq deŋgeidı baǧyndyrdy. Naqtyraq aitsaq, alǧaşqy üş künnıŋ özınde film million dollarǧa juyq qarjy jinaǧan. Jarnamasy jürıp tūrǧan jaŋa kino jaily sala mamandary ne deidı? Sonymen,
KİNONY KIM KALAI BAǦALADY?
Bauyrjan NÖGERBEK,
kinotanuşy:
Eŋ ülken jetıstıgı – rejisser tarihi ekşn janryn keremet alyp şyqqan. Būdan būrynǧy «Köşpendıler» filmı de osy talappen tüsırılgen bolatyn. Bıraq, şyny kerek, üdesınen şyǧa almady. Kinoǧa qatysty «qazaqtyŋ tarihy, tarihi tūlǧalary dūrys qamtylmady» degen syn-eskertpeler aityldy kezınde.
Būl filmde tarihi tūlǧalarymyz ekınşı planda. Dese de, filmge arqau bolǧan jas batyrlardyŋ erlıgı jönındegı negızgı oqiǧa öte nanymdy, qyzǧylyqty etıp körsetılgen. Akterlerdıŋ oiyny keremet. Montajdaluy odan da keremet. Tanymal akterlermen bırge jas talanttardyŋ taŋdaluy öte qūptarlyq. Kostiumderı de öte jaqsy taŋdalypty.
Bır ǧana ättegen-aiy, kinoǧa Nūrǧisa aǧamyzdai kompozitor jetıspei tūr. Kezınde «Qyz Jıbektıŋ» muzykasyn qandai etıp jazyp edı ol kısı.
Sosyn, filmnıŋ bır-ekı tūsynda tanymal tūlǧalardyŋ körınıp qaluy menıŋşe, dūrys şeşım emes. Basynda jäne soŋynda berıletın titrler de qajet emes edı. Körermendı filmnıŋ atmosferasynan şyǧaryp jıberedı. Maǧan mūnyŋ bärı jalǧan jarnama sekıldı körındı. Jalpy, jaqsy film.
Ermek AMANŞAEV,
Ş.Aimanov atyndaǧy
«Qazaqfilm» AQ prezidentı:
Joŋǧar-qazaq soǧysynan özge taqyryp joq pa deitınder tabylyp jatyr. Alaida, kez kelgen ūlttyŋ taǧdyrynda şeşuşı oqiǧalar, kezeŋder bolady. Osy tūrǧyda qazaq-joŋǧar soǧysyn attap ötu mümkın emes
Aqan – bügınde aldyŋǧy qatarly rejisserlerımızdıŋ bırı. Būǧan deiıngı tarihi taqyrypta film tüsırgen rejisserlerdıŋ jete almaǧan biıgıne Aqan jetken sekıldı. «Jaujürek myŋ bala» būǧan deiıngı kartinalar kötere almaǧan jüktı arqalauǧa tyrysty.
Bızdı quantqany – «Jaujürek myŋ bala» filmınde 99 paiyz öz elımızdıŋ mamandary, akterlerı jūmys jasady. Nätijesınde, qazaq kinosyna jaŋa esımder qosyldy. Basty rölderdı oinaǧan jastar Asylhan Tölepov, Aian Ötepbergen, Qūralai Anarbekovalar aǧa buyn akterlerden kem oinaǧan joq. Būlar – qazaq kinosynyŋ bolaşaq jūldyzdary.
Film mamyrdyŋ ortasynda Kann festivalı aiasynda körsetıledı. Oǧan 30-dan astam eldıŋ distribiuterlerı jinalyp jatyr. Aldaǧy 1-2 aida älemdık ekranǧa şyǧaryp, täjıribelı distribiuterlermen kezdesemız.
