Memleket basşysy Nūrsūltan Nazarbaev «Bolaşaqqa baǧdar: ruhani jaŋǧyru» atty baǧdarlamalyq maqalasynda «Qazaq «Tuǧan jerge tuyŋdy tık» dep beker aitpaǧan. Patriotizm kındık qanyŋ tamǧan jerıŋe, ösken auylyŋa, qalaŋ men öŋırıŋe, iaǧni tuǧan jerıŋe degen süiıspenşılıkten bastalady» dei kele, «Tuǧan jer» baǧdarlamasyn qolǧa aludy ūsyndy. Onyŋ män-maŋyzyn «Tuǧan jer – ärkımnıŋ şyr etıp jerge tüsken, bauyrynda eŋbektep, qaz basqan qasiettı mekenı, talai jannyŋ ömır baqi tūratyn ölkesı. Ony qaida jürse de jüregınıŋ tübınde äldilep ötpeitın jan balasy bolmaidy» degen sözdermen tüsındırıp öttı.
Soltüstık Qazaqstan oblysy Jambyl audanyndaǧy Maibalyq auylynyŋ qūrylǧanyna biyl 90 jyl tolyp otyr. Juyrda Astanada būl auyl tarihynan syr şertetın «Orny dara, jūrty dana Maibalyq» atalatyn kıtaptyŋ tanystyrylymy boldy. Būl künde elordada osy auyldan şyqqan 30 şaqty şaŋyraq tūrady. Olardyŋ arasynda Nauan, Änuar, Boranbai Sarinder de bar. Osy aǧaiyndy azamattar byltyr jaryq körgen atalmyş kıtapty qosymşa bastyryp, bas qaladaǧy jerlesterıne taratyp berdı.
«Maibalyq auylynan 3 şaqyrym jerde barşa qazaqqa äigılı Gültöbe-Mamanai dep atalatyn alqapta Qojabergen jyrau, Tolybai synşy, Segız serı jerlengen. Qazaq ädebietınıŋ negızın qalauşy Säbit Mūqanov, Ǧabit Müsırepov, Safuan Şäimerdenov syndy jazuşylardyŋ ataqonysy, kındıgı kesılgen mekenı – osy jer. Osydan 10 jyl būryn auylymyzdyŋ 80 jyldyǧyn atap ötken bolatynbyz. Sol kezde Maibalyq auylynyŋ 8 jyldyq mektebınıŋ direktory bolǧan Taŋat Sügırbaev pen auylymyzdyŋ tumasy, jurnalist Ahmetjan Quantaev kıtap jazudy bastady. Jetı-segız jyldyŋ ainalasynda materialdardy jinaqtap, «Orny dara, jūrty dana Maibalyq» kıtaby jaryq kördı. Kıtaptyŋ tūsaukeserı byltyr küzde Petropavl qalasyndaǧy Säbit Mūqanov atyndaǧy oblystyq kıtaphanada öttı» deidı Nauan Sarin.
