ÄKELER ÄDEPKE ŞAQYRDY
Ötken aptada №59 mektep-liseiınıŋ bastamasymen äkeler sletı öttı. 15 mamyr – halyqaralyq otbasy künıne orailastyrylǧan būl şaraǧa QR Bılım jäne ǧylym ministrlıgınıŋ, Astana qalalyq äkımdıgınıŋ ökılderı qatysty. Şara barysynda ūstazdar men ata-analar ūrpaq tärbiesı turaly oilaryn ortaǧa saldy.
Aita keterlıgı, atalǧan mekteptıŋ bastamasymen byltyr balalardyŋ tärbiesıne tiısınşe köŋıl bölmegen ata-analarmen jūmys ısteitın arnaiy Äkeler keŋesı qūrylǧan bolatyn. Keŋestıŋ maqsaty – otbasyndaǧy äkenıŋ bedelın arttyryp qana qoimai, onyŋ bala tärbiesındegı mındetın ūlttyq dästür negızınde qalyptastyru edı. Sondai-aq, keŋes balalar arasyndaǧy būzaqylyqtyŋ aldyn alu mäselelerımen ainalysyp, synyp jetekşılerıne mınez-qūlqy qiyn jasöspırımderdı tärbieleude qol ūşyn beredı.
Ūiymdastyruşylardyŋ aituynşa, bala tärbiesıne tek analar jauapty degen pıkırdı özgertuımız kerek. Äke – balaǧa synşy, ärı aqylşy, tıregı bola bıluı tiıs.
Osy slet aiasynda elordalyq mektep oquşylarynyŋ ata-analary mektep aulasynan Äkeler saiabaǧyn aşty.
Erkejan SÄTIMBEK